Parlament terrorızmge qarsy is-qımyldy qamtyǵan zańdy qabyldady
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerge kelisimin berdi. Osylaısha, Parlament atalǵan zańdy qabyldap otyr. Endi qujat Memleket basshysynyń qol qoıýyna joldanady.
Qujattyń maqsaty - ekstremızmge jáne terrorızmge qarsy is-qımyl salasyndaǵy zańnamany jetildirý. Bul rette qujat memlekettik organdardyń ókilettikterin, quqyqtary men mindetterin naqtylaýǵa baǵyttalǵan erejelerdi qarastyrady. Ekstremızmge jáne terrorızmge qarsy is-qımyl jónindegi jekelegen ókilettikter jergilikti deńgeıge berildi. Sonymen qatar, zań jobasymen sot tártibimen ekstremıstik nemese terrorıstik dep tanylǵan uıymdar týraly derekterdi, osyndaı quqyq buzýshylyq jasaǵan adamdardy, ekstremıstik jáne terrorıstik mazmundaǵy aqparattyq materıaldardy esepke alýdyń arnaıy nysanyn engizý kózdeledi. Belgili bir uıymdy sot tártibimen ekstremıstik nemese terrorıstik dep tanýdyń jeńildetilgen joly qarastyrylady. Sosyn sot osyndaı sheshim shyǵarǵan jaǵdaıda, bul sheshim dereý oryndalýǵa jatatyn bolady.
Toqtala ketetin jaıt, Senat Májilis maquldaǵan zań jobasyna tórt túzetý engizgen bolatyn. Bular negizinen redaktsııalyq naqtylaý sıpatynda bolyp tabylady. Máselen, zań jobasynda qarjy polıtsııasy organdaryna ekstremızm men terrorızmge qarsy belgili bir ókilettikter berý usynylǵan bolatyn. Alaıda, Memleket basshysynyń Jarlyǵyna sáıkes, qarjy polıtsııasy organynyń fýnktsııalary Qarjy mınıstrliginiń Memlekettik kiris komıtetiniń jańadan qurylǵan ekonomıkalyq tergeý qyzmetine beriledi. Senatorlar engizgen túzetý negizinen osy baǵytta bolyp otyr.
Mundaı túzetýlerge Májilis óz kelisimin berip otyr.
