Parlament tehnıkalyq retteý jáne metrologııa máselelerine arnalǵan zańdy qabyldady
ASTANA. 28 maýsym. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine tehnıkalyq retteý jáne metrologııa máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Parlament qabyldaǵan zań tehnıkalyq retteý salasyndaǵy ulttyq zańnamany Eýrazııalyq ekonomıkalyq qoǵamdastyqtyń Memleketaralyq keńesiniń 2009 jylǵy 11 jeltoqsanyndaǵy sheshimimen qabyldanǵan Halyqaralyq sharttarǵa sáıkestendirýdi kózdeıdi. Budan bólek, Dúnıejúzilik saýda uıymynyń saýdadaǵy tehnıkalyq kedergiler jónindegi kelisiminde belgilengen halyqaralyq termınologııaǵa qoldanystaǵy zań normalary sáıkestendiriledi.
Osy maqsatta birqatar qujattarǵa ózgerister engizilip otyr. Atap aıtqanda, tehnıkalyq retteý jáne ólshem birligin qamtamasyz etý salasyndaǵy zańnamany buzǵandyǵy úshin ákimshilik jaýapkershiliktiń arajigin ajyratý jáne ony kúsheıtý normalary engiziledi. Budan basqa, tehnıkalyq reglamentter, standarttar jáne normatıvtik-tehnıkalyq qujattar salasyndaǵy biryńǵaı memlekettik qor qurý qarastyrylady. Standarttar ázirleý jónindegi jumystardy ǵylymı-zertteý jumystaryna jatqyzý jáne ólshem quraldaryn jóndeý ári jasaý quqyǵyn alý úshin lıtsenzııalaýdaǵy mindetteligi joıylatyn bolady.
Jalpy alǵanda atalǵan qujat arqyly Azamattyq, Orman, Sý, Ekologııalyq, Salyq kodeksterine, «Halyq densaýlyǵy jáne densaýlyq saqtaý júıesi týraly» kodekske jáne birqatar zańdarǵa «ulttyq standarttar» degen termındi birkelki qoldanýǵa qatysty ózgerister engiziledi.
Al Ákimshilik quqyq búuzýshylyq týraly kodekske taýardyń shyǵarylýy týraly sertıfıkatty jáne Keden odaǵyyń taýary nysandarynyń qorytyndysyn berý tártibiniń buzylǵany úshin jaýaptylyq belgileý bóliginde ózgerister qamtylady.
Parlament qabyldaǵan zań Memleket basshysynyń qol qoıýyna jiberiledi.
