Parlament táýelsiz sot-saraptama qyzmeti jónindegi zańdy qabyldady
ASTANA. Jeltoqsannyń 24-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasyndaǵy sot-saraptama qyzmeti týraly» QR Zańy qabyldandy.
Palata depýtattary atalǵan qujat boıynsha qos palata arasyndaǵy kelispeýshilikterdi eńserý jónindegi kelisim komıssııasynyń usynystarymen kelisip, osyndaı qaýly qabyldady. Endi qujat Memleket basshysynyń qol qoıýyna jiberiledi, dep habarlaıdy QazAqparat.
Esterińizge sala keteıik, qujat táýelsiz jáne obektıvti sot-saraptama qyzmetin qamtamasyz etý úshin tıisti zańdarǵa ózgerister engizýdi qarastyrady. Budan basqa, zańnyń negizgi maqsaty elimizdegi sot-saraptama qyzmetin barlyq qyrynan retteý bolyp tabylady. Óıtkeni qazirgi qoldanystaǵy zańnamada sot saraptamasyn júrgizý jáne taǵaıyndaý rettelgenimen, onyń uıymdyq, ǵylymı-ádistemelik qyrlary boıynsha sot-saraptama qyzmetiniń ózine qatysty máseleler jetkilikti túrde kórinis tappaǵan. Sonymen qatar qujat boıynsha sot saraptamasy mekemeleriniń quqyq qorǵaý organdarymen ózara árekettesýi máselesin retteý úshin sarapshy men quqyq qorǵaý organy mamanynyń zertteý óndirisin birigip júrgizý usynylady. Sol sekildi zertteýlerdiń zańdylyǵy men durystyǵyn qamtamasyz etý maqsatynda zertteýlerdiń barlyq ádistemeleri saraptamalyq ádistemelerdiń biryńǵaı tizbesinde bekitilmek.
Sondaı-aq zańda saraptama mekemesi basshysynyń mindetteri men quqyqtary anyqtalady. Sot-saraptamasy zertteýin júrgizý tártibi retteledi. Sarapshylarǵa qoıylatyn negizgi talaptar, sot sarapshysynyń biliktiligi kýáligin berý, olardy attestatsııadan ótkizý tártibi belgilenedi, Úkimettiń jáne sot saraptama qyzmeti salasyndaǵy ýákiletti organdardyń quzireti aıqyndalady.
