Parlament tabıǵı monopolııalar qyzmetiniń ashyqtyǵyna baǵyttalǵan zańdy qabyldady

ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine tabıǵı monopolııalar jáne retteletin naryqtar máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerdi qarady. Májilis depýtattary Senat usynǵan túzetýlerge kelisim berip, qujat qabyldandy.

Endi Parlament qabyldaǵan zań Memleket basshysynyń qol qoıýyna joldanady.

Eske sala keteıik, qujat tabıǵı monopolııalar qyzmetiniń ashyqtyǵyn arttyrýǵa baǵyttalady. Sonymen qatar zań jobasynda tabıǵı monopolııalarǵa qatysty negizsiz shyǵyndardy boldyrmaý, tarıftik úderisterdi ońtaılandyrý, tutynýshylar quqyǵyn qorǵaý máseleleri qamtylyp otyr. Atap aıtqanda, tarıf qalyptastyrý jáne monopolıster qyzmetiniń ashyqtyǵyn arttyrý maqsatynda tarıfterge saraptama jasaý úshin Saraptamalyq keńes qurýdy zańdyq negizde bekitý kózdeledi. Budan bólek, energetıka salasyndaǵy domınanttarǵa buqaralyq tyńdaýlar ótkizý mindeti engiziledi, esep berýler men buqaralyq tyńdaýlar boıynsha talaptar kúsheıtiledi. Al negizsiz shyǵyndardy alyp tastaý jáne tarıftik úrdisterdi ońtaılandyrý maqsatynda tarıften qarjylyq jáne tehnıkalyq saraptama shyǵyndaryn alyp tastaý qarastyrylǵan.

Qujatty Senatta talqylaý barysynda joǵary palata depýtattary oǵan birqatar ózgerister engizip, Májiliske qaıtarǵan bolatyn. Atap aıtqanda, joǵary palata depýtattary kólik quraldaryn toqtatý men aqyly turaqqa qoıý erejelerin buzǵandyǵy úshin ákimshilik jaýapkershilikti engizýdi usynady. Qalalyq qoǵamdyq kólikte saralanǵan tarıfter belgileýde «Avtomobıl kólikteri týraly» zańdy qaıta qaraý usynyldy.