Parlament syrtqy barlaý qyzmetin jetildirýge baǵyttalǵan zańdy qabyldady
Qujatta syrtqy barlaýdyń jáne arnaýly memlekettik organdardyń sýbektileri úshin basqa memlekettik organdar men uıymdardyń qujattaryn daıyndaý, rásimdeý quqyǵyn ulttyq qaýipsizdik organdaryna bekitý normalary qarastyrylady. Budan bólek, QR Qorǵanys mınıstrliginiń áskerı barlaý organdary jáne QR Ulttyq qaýipsizdik organdary syrtqy barlaýdyń sýbektileri retinde aıqyndalatyn bolady. Sonymen qatar, syrtqy barlaý salasyndaǵy ýákiletti organnyń quzyreti naqtylanady. Barlaý organdarynyń qyzmetkerleri men áskerı qyzmetshileriniń jeke basyn jedel búrkemeleý maqsatynda basqa memelkettik organdar men uıymdardyń qujattaryn daıyndaý, ony rásimdeý quqyǵy ulttyq qaýipsizdik organdaryna bekitiledi.
«Qujat elimizdiń syrtqy barlaý qyzmetin odan ári jetildirýge baǵyttalǵan. Qazirgi tańda álemde ulttyq qaýipsizdikke nuqsan keltirýi múmkin oqıǵalar oryn alýda. Memleketimizdiń turaqtylyǵy men tynyshtyǵyn saqtaý úshin osyndaı qaýipti úrdiske tereń taldaý jasap, olardyń aldyn alýǵa baǵyttalǵan sharalardy kúsheıtý qajet. Dástúrli áskerı, saıası ǵana emes, ekonomıkalyq, ekologııalyq, tehnıkalyq, aqparattyq sıpattaǵy qaterlerge da nazar aýdarý - ýaqyt talaby. Sondyqtan, qabyldanatyn qujat elimizdiń syrtqy barlaý salasyndaǵy birlesken qımyldardy nyǵaıtýǵa, osy baǵyttaǵy jumystardy tıimdi atqarýǵa múmkindik beredi», - dedi senator Ikram Adyrbekov. Parlament qabyldaǵan zań Memleket basshysynyń qol qoıýyna joldanady.