«Parlament sózi» syılyǵynyń bıylǵy ıegerleri belgili boldy
ASTANA. KAZINF,ORM – Májiliste BAQ qyzmetkerlerine arnalǵan «Parlament sózi» syılyǵynyń ıegerleri marapattaldy. Úzdikter qatarynda Jibek Joly telearnasynyń tilshisi, áriptesimiz Asylbek Toıbekov te bar. Ol «Úzdik televızııalyq sıýjet úshin» atalymy boıynsha jeńimpaz atanyp otyr.
Saltanatty jıyndy ashqan Májilis tóraǵasy Erlan Qoshanov zań shyǵarý isindegi BAQ-tyń róline toqtaldy.
– Qazir qoǵamdy jýrnalıssiz elestetý múmkin emes. Halyq sizderdiń jazǵan maqalalaryńyz, sıýjetterińizden elimizdegi jáne álemdegi oqıǵalardan habardar bolyp otyrady. Ásirese, Memleket basshysy Qasym-Jomart Kemelulynyń saıası-ekonomıkalyq reformalary men aýqymdy bastamalaryn halyqqa durys túsindirýge mol úles qosyp kelesizder. Sonyń ishinde Parlamentte qabyldanyp jatqan zańdar sizder arqyly nasıhattalyp jatyr. Zańdy qabyldaý bir bólek, ony halyqqa durys jetkizý – ol da negizgi mıssııanyń biri, – dedi ol.
Palata spıkeri Májiliste 700-den astam BAQ ókili akkredıttelgenin aıtty. Aıtýynsha, bul tizim ýaqyt ótken saıyn ulǵaıyp keledi.
– Elimizdiń odan ári damýyn myqty buqaralyq aqparat quraldarynsyz elestetý qıyn. Sondyqtan búginde BAQ-tyń jan-jaqty damýyna qajetti jaǵdaıdyń barlyǵy jasalýda. Sizdermen birge biz jańa salalyq zań qabyldadyq. Ol jýrnalısterdiń quqyqtaryn qorǵaýdy kúsheıtti. Blogerler men basqa da aqparat kózderi búginde BAQ-pen básekelesýge tyrysyp jatyr. Biraq memleket baıypty jýrnalıstıkaǵa suranysty júıeli túrde qalyptastyryp otyr, – dedi Erlan Qoshanov.
Aıta ketý kerek, «Parlament sózi» syılyǵy bıyl toǵyzynshy jyl ótip otyr. Osy ýaqyt ishinde 140-qa jýyq adam marapattalǵan.
Májilis tóraǵasy bıyl baıqaýǵa qatysýǵa 100-den astam ótinim kelip túskenin atap ótti.
Sonymen 2025 jylǵy «Parlament sózi» syılyǵy ıegerleri tizimi mynadaı:
- «Úzdik baspa jarııalanymy úshin» – Zeıin Erǵalıeva («Egemen Qazaqstan» gazeti), Vladıslav Shpakov («Vremıa» gazeti);
- «Úzdik televızııalyq sıýjet úshin» – Asylbek Toıbekov («Jibek joly» telearnasy), Meıramgúl Mádáli («Atameken Business» telearnasy), Álibek Rzabaev (Eýrazııa birinshi arnasy, «Parlament Online» baǵdarlamasy);
- «Úzdik beıne-sýret materıaly úshin» – Almas Jýlýbaev («Astana» telearnasy);
- «Úzdik ınternet jáne radıo materıaly úshin» – Áıgerim Baqpaeva («Baigenews.kz» ınternet portaly), Azamat Tlepov (Qazaq radıosy), Áıgerim Týkýsheva («Kursiv.kz» saıty), Tamara Vaal ( «Vlast.kz» saıty);
- «Arnaıy reportaj» – Irına Álimjanova (Qazaqstan ulttyq arnasy, «Qos palata» baǵdarlamasy), Alına Shashkına («Tengrinews.kz» ınternet portaly), Dáýren Omarov («Adal adam» youtube arnasy);
- «Parlamenttik jýrnalıstıkany damytýǵa qosqan úlesi úshin» – Erkin Jumataev («Habar» agenttigi), Aleksandr Trýhachev («KTK» telearnasy);
- «Parlament sózi» Arnaıy nomınatsııasy – «Azattyq rýhy» saıtynyń jáne «24KZ» telearnasynyń ujymdary.
Buǵan deıin Prezıdent Qasym-Jomart Toqaev BAQ salasy qyzmetkerlerin marapattaǵanyn jazǵan edik.