Parlament sotqa deıingi is júrgizý máselelerin qamtyǵan zańdy qabyldady
ASTANA. Qarashanyń 12-si. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń Qylmystyq is júrgizý kodeksine sotqa deıingi jeńildetilgen is júrgizý máseleleri boıynsha ózgerister men tolyqtyrýlar engizý týraly» zań jobasyna baılanysty kelispeýshilikterdi eńserý jónindegi kelisim komıssııasynyń usynystaryn talqylap, qujatty qabyldady,
dep habarlaıdy QazAqparat.
Atalǵan qujat qylmystyq isten kúdikti azamatqa qatysty naqty aıǵaqtary bar asa aýyr emes qylmystar boıynsha is júrgizýdiń sotqa deıingi rásimin ońaılatýǵa baǵyttalǵan. Qazirgi tańda aldyn ala anyqtaý men tergeý barlyq qylmystarǵa qatysty júrgiziledi. Óıtkeni qoldanystaǵy tergeý rásimi keńestik júıeniń tártibin saqtap qalǵan. Sonyń saldarynan qazir qylmystyq úderiske qatysýshy azamattar ishki ister jáne ózge de organdarǵa birneshe ret shaqyrylady jáne olarǵa qatysty kóptegen tergeý áreketteri júrgiziledi. Ýchaskelik ınspektorlar men tergeýshiler, anyqtaýshylar odan soń sot ókilderi barlyǵy da jaýap alady. Nátıjesinde jeńil qylmystyq iske qatysty kúdikti óziniń kinásin moıyndap, qajetti derekter jetkilikti bolsa da birneshe aı boıy tergeledi.
Osyǵan oraı, jańa zań jobasynda asa aýyr emes qylmystar boıynsha tıisti materıaldar sottyń qaraýyna aınalasy 10 kúnniń shamasynda jiberiledi. Al sot óz kezeginde prokýror men advokattyń jáne basqa da osy úderiske qatysýshylardyń aralasýymen berilgen materıaldardy az ǵana ýaqyt ishinde qarastyryp, tıisti azamattyń kinási men jazasyn belgileıdi. Sóıtip, bir jaǵynan aýyr emes qylmystardy tergeýdiń merzimi qysqaryp, jemqorlyq áreketterge tosqaýyl qoıylady.
Kelisim komıssııasy kelispeýshilikter boıynsha birqatar usynystardy birlesken redaktsııada qabyldaýdy usynǵan bolatyn. Palata depýtattary atalǵan sheshimdi qabyldady.
Zań Memleket basshysynyń qol qoıýyna jiberiledi.
