Parlament sot júıesin jańǵyrtý týraly zańdardy qabyldady
NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrý engizý týraly» QR Konstıtýtsııalyq Zańy qabyldandy, dep habarlaıdy QazAqparat tilshisi.
«Konstıtýtsııalyq zańǵa eki bólikke bólýge bolatyn túzetýler engizildi. Birinshiden, Joǵarǵy sotta ákimshilik ister boıynsha sot alqasyn qurý usynylady. Oblystyq sottarda da tıisti sot alqalary qurylatyn bolady. Bul is-shara sot júıesine óńirlerde isterdiń bólinýine baılanysty únemi ózgerip otyratyn jaǵdaıǵa jedel den qoıýǵa múmkindik beredi.
Ekinshiden, zań jobasynda Memleket basshysy taǵaıyndaýǵa usynatyn Joǵarǵy sot tóraǵasy jáne Joǵarǵy sot sýdıalary laýazymdaryna kandıdattarǵa qoıylatyn talaptarǵa qatysty ózgerister bolyp otyr. Bul túzetýler Memleket basshysy usynǵan kandıdattarǵa ǵana qatysty ekenin erekshe atap ótken jón. Olar basqa sýdıalarǵa qatysty bolmaıdy jáne zańnamaǵa sáıkes olar Joǵary sot Keńesiniń usynymynan ótedi», - dedi senator Sáýle Aıtpaeva.
Onyń aıtýynsha, Ákimshilik quqyq buzýshylyq týraly kodeksten «Joǵarǵy sottyń mamandandyrylǵan sot alqasy» uǵymyn alynyp tastaý usynylyp otyr jáne osy jyldyń 1 shildeden bastap Ákimshilik rásimdik-protsestik kodeksi shynymen jumys isteı bastaý úshin retteýge baǵyttalǵan. Sonymen qatar, Ákimshilik quqyq buzýshylyq týraly kodeksinde sybaılas jemqorlyqqa qarsy is-qımyl jónindegi ýákiletti organǵa ákimshilik sybaılas jemqorlyq quqyq buzýshylyqtar boıynsha is qozǵaý quqyǵyn beredi.
Sonymen birge, búgin jalpy otyrysta eki oqylymda qaralyp, qabyldanǵan «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» Zańy joǵaryda aıtylǵan Konstıtýtsııalyq Zańǵa sáıkes keltirý maqsatynda ázirlendi. Bul zań jobasynyń basty maqsaty ınvestorlar qatysatyn daýlardyń ınstantsııalaryn qaıta qaraý bolyp otyr.
«Birkelki júktemeni bólý jáne biryńǵaı praktıkany ázirleý maqsatynda atalǵan eki kodekste ınvestordyń qatysýymen daýlardyń ınstantsııalaryn qaıta qarastyrý boıynsha tıisti túzetýler engizilgen. Atap aıtatyn bolsaq, ınvestorlar qatysatyn daýlardyń qaralýyn Nur-Sultan qalasynyń mamandyrylǵan aýdanaralyq ekonomıkalyq sotqa beriledi. Atalǵan sot ınvestıtsııalyq daýlar boıynsha azamattyq isterdi, sondaı-aq ınvestordyń ınvestıtsııalyq qyzmetine baılanysty memlekettik organdardyń ınvestorlarǵa talap qoıýlaryn qaraıdy. Zań jobasynda mamandandyrylǵan sottardyń, tolyqqandy úsh satyly sot qorǵaý júıesiniń saqtalýyn jáne Joǵarǵy Sottyń kassatsııalyq is júrgizýdi júzege asyrýyn eskere otyryp, ınvestorlardyń qatysýymen daýlardyń naqty satylylyǵyn aıqyndaý usynylady», - dedi depýtat.
Munymen qosa, jalpy otyrysta «Qazaqstan Respýblıkasynyń Ákimshilik quqyq buzýshylyq týraly kodeksine ózgerister engizý týraly» Zańy eki oqylymda qaralyp, qabyldandy.
