Parlament Senatynyń talqylaýynda 5 ulttyq qundylyq máselesi kóteriledi
«Prezıdent aıtqan «jańa bolmys» pen «ult sapasyn» qalaı jaqsarta alamyz? Mundaı oılar bárińizdi tolǵandyryp júrgen bolar?! Árıne, ony álemdik órkenıet jolymen, ulttyq qundylyqtarymyzdy qatar damytqanda ǵana júzege asyra alamyz.
Sonda ǵana ulttyq qundylyqtarymyzdy qalyptastyryp, ony ornyqtyrýǵa, ómirge kiriktirýge bolady. Iá, osy jyldary biraz jumystar atqaryldy. «Mádenı mura», «Bolashaqqa baǵdar: Rýhanı jańǵyrý», «Uly dalanyń jeti qyry» atty jobalar oıdaǵydaı júzege asyryldy, áli de oryndalyp jatyr. Bular –memlekettik deńgeıdegi irgeli jobalar», - dedi senator «Ulttyq qundylyqtar - rýhanı jańǵyrýdyń negizi» taqyrybyna arnalǵan dóńgelek ústel otyrysynda.
Osy oraıda ol ulttyq qundylyqtar azaıǵan saıyn, adamnyń rýhanı beınesi de ózgeretinin atap ótti.
«Ózgeden góri – ózin, qoǵamnan góri – jeke otbasynyń paıdasyn oılaıtyn, rýhanı jaǵynan birshama júdeý, bilim jaǵynan saıazdaý urpaq kóbeıgeni alańdatady. Osyǵan oraı, bes qundylyq baǵytyn usynyp otyrmyn», - dedi B. Jumaǵulov.
Bul turǵyda depýtat bes qundylyq boıynsha jekeleı toqtaldy.
Birinshi qundylyq – ol táýelsizdik jáne tarıhı tanym. Óıtkeni táýelsizdik – egemendikti ǵana alyp kelmeı, sonymen qatar, ultymyzdyń sanasyn ózgertti, sapasyn jaqsartty.
Ekinshi qundylyq – el men jer. Ulanǵaıyr dalany babalarymyz kóziniń qarashyǵyndaı saqtady.
Úshinshi qundylyq – til men ımandylyq.
Tórtinshi qundylyq – ulttyq dástúr jáne otbasylyq tárbıe. Ulttyq dástúr jáne otbasylyq tárbıe – patrıotızmniń bastaýy. Besikten tárbıeleý – ulttyq uǵym kepili.
Besinshi qundylyq – bilim men biliktilik.
«Bul týraly jáne joǵaryda aıtylǵan bes baǵyt pen ulttyq qundylyqtar jóninde Senattaǵy Parlamenttik tyńdaýda keńinen aıtylatyn bolady... Bir qaraǵanda, Uly dalanyń ulttyq qundylyqtaryn bárimiz biletin sekildimiz. Ol barshamyzǵa túsinikti sııaqty. Al tereńnen qarasaq, ulttyq qundylyqtarymyzdy Qazaqstannyń árbir azamatynyń sanasyna endirip, ony ornyqtyrý qajet», - dedi senator.
Onyń paıymynsha, ulttyq qundylyqtarymyzdyń ornyna batystyq qundylyqtardy endirý protsesi ornyǵa bastady. Demokratııa degen jeleýmen halqymyzdyń, onyń ishinde jastarymyzdyń saıası kózqarasyna yqpal etýshilik júrgizilip jatyr. Ártúrli jat dinı aǵymdar boı kóterdi.
Budan buryn habarlanǵandaı, Parlament Senatynda «Uly dala qundylyqtary» taqyrybynda parlamenttik tyńdaý ótedi.
