Parlament Senatynda kóshi-qon salasyndaǵy zańnamany jetildirý taqyrybyna arnalǵan ǵylymı-tájirıbelik konferentsııa boldy
ASTANA. Maýsymnyń 18-i. QazAqparat - Búgin Parlament Senatynda palata tóraǵasy Qasym-Jomart Toqaevtyń qatysýymen kóshi-qon protsesteri jáne kóshi-qon salasyndaǵy zańnamany jetildirýdiń keleshegi taqyrybyna arnalǵan ǵylymı-tájirıbelik konferentsııa boldy. Sharaǵa Áleýmettik-mádenı damý komıtetiniń tóraǵasy Ahan Bıjanov tóraǵalyq etti.
Konferentsııaǵa qatysýshylarǵa - Parlament depýtattaryna, «Nur Otan» partııasynyń, memlekettik organdardyń, halyqaralyq, qoǵamdyq, úkimettik emes uıymdar men ǵylymı orta ókilderine arnaǵan sózinde Q.Toqaev bıylǵy mamyrda elimizdiń Qaýipsizdik keńesiniń otyrysynda memlekettik kóshi-qon saıasaty máseleleri jónindegi Memleket basshysy aıtqan tapsyrmalardy talqylaýdyń ózekti ekenin atap ótti.
Osy saladaǵy mindetterdi júzege asyrý aıasynda tóraǵa ishki jáne syrtqy kóshi-qon úrdisterin quqyqtyq retteýdiń mańyzdylyǵyna toqtaldy. Qazaqstanda tolyqqandy zańnamalyq irgetas jasaldy. Qazaqstan Respýblıkasynyń 2007-2015 jyldarǵa arnalǵan kóshi-qon saıasatynyń tujyrymdamasy qabyldandy.
Bizdiń elimizdiń jahandyq deńgeıdegi kóshi-qon máselelerin retteý úderisterine qatysyp kele jatqanyn onyń Bosqyndar mártebesi jónindegi konventsııa men eńbekti uıymdastyrý jónindegi halyqaralyq 15 konventsııaǵa qosylýy, Halyqaralyq kóshi-qon uıymymen yntymaqtastyq týraly kelisimdi ratıfıkatsııalaýy dáleldep otyr.
Bizdiń qandastarymyzdyń tarıhı Otanyna oralý máselelerine memlekettik deńgeıde nazar aýdarylyp keledi. «Nurly kósh» baǵdarlamasy qabyldandy. Táýelsizdik alǵannan beri bizdiń elimizge 1 mıllıonnan astam oralmandar keldi. Búginde kóshi-qon kvotasy jylyna 20 myń otbasyna deıin ulǵaıtyldy, azamattyq alý rásimderi ońaılatyldy, beıimdelý ortalyqtary ashyldy, qarjylaı kómek berildi, quqyqtyq jeńildikter belgilendi.
Ngezgi baıandama jasaǵan Eńbek jáne halyqty áleýmettik qorǵaý mınıstri Gúlshara Ábdihalyqova kóshi-qon saıasatynyń negizgi baǵyttary týraly aıta kelip, osy saladaǵy zańnamany jetildirý jaıynda oılaryn ortaǵa saldy.
Senator Anatolıı Bashmakov jahandyq jáne aımaqtyq kóshi-qonnyń ınstıtýttsıonaldyq jáne qurylymdyq zardaptary máselelerine nazar aýdardy. Adam kapıtalyn damytý, áleýmettik damýdyń jańa sapadaǵy saıasatty qalyptastyrýdaǵy mindetterdiń aıqyndala túsetinin eskere kelgende, depýtattyń pikirinshe, quqyqtyq, zań, mádenı ınstıtýttardyń róli de ulǵaıatyn bolady. «Bul jaǵdaılarda jahandyq qaterlerge aýqymdy halyqaralyq yntymaqtastyqty damytý laıyqty jaýap bolmaq»,-dedi A.Bashmakov.
Konferentsııada sondaı-aq EQYU-nyń Astanadaǵy ortalyǵynyń basshysy A.Kelchevskıı, MMHQI álemdik ekonomıka kafedrasynyń professory A.Kamenskıı, ishki ister mınıstriniń orynbasary A.Kýlınıch, Májilis depýtaty J.Súleımenov, EUÝ áleýmettik ǵylymdar fakýltetiniń dekany Z.Qabyldınov, Dúnıejúzi qazaqtary assotsıatsııasy tóraǵasynyń orynbasary S.Balǵabaev, Mańǵystaý oblysy ákiminiń orynbasary M.Júnbasov sóz sóıledi.
Talqylaýdy qorytyndylaı kelip, Áleýmettik-mádenı damý komıtetiniń tóraǵasy A.Bıjanov kóshi-qon týraly jańa zań qabyldaýdyń qajettigin atap ótti. Bul zań, senatordyń aıtýynsha, memlekettik kóshi-qon saıasatynyń quqyqtyq tetikterin qalyptastyrý salasynda mańyzdy qosymsha bolady.
Konferentsııa barysynda aıtylǵan pikirler men eskertpelerdi eskere otyryp, tıisti usynymdar qabyldandy.
