Parlament Senatynda Eýropalyq Odaq ókilimen kezdesý ótti

NUR-SULTAN. QazAqparat - Qazaqstan Respýblıkasy Parlamenti Senaty Tóraǵasynyń orynbasary Asqar Shákirov Eýropalyq Odaqtyń Ortalyq Azııa boıynsha arnaıy ókili Terı Hakalamen kezdesti, dep habarlaıdy QazAqparat QR Parlamenti Senatynyń baspasóz qyzmetine silteme jasap.

Kezdesý barysynda Vıtse-spıker EO ókiline Senat qyzmetiniń negizgi baǵyttary jáne Memleket basshysynyń elimizdi jańǵyrtý baǵdaryn iske asyrý úshin qabyldanǵan zańdar týraly habardar etti.

Sonymen qatar Senat Tóraǵasynyń orynbasary Qazaqstan demokratııany, quqyq ústemdigin jáne adam quqyqtaryn nyǵaıtý máselelerine basa mán beretinin, bul elimizdiń ózara is-qımyldyń barlyq deńgeıinde syndarly dıalogqa daıyn ekenin kórsetetinin atap ótti. Kezdesý barysynda Qazaqstannyń adam quqyqtary salasyndaǵy barlyq derlik halyqaralyq qujattardyń, onyń ishinde BUU-nyń 7 negizgi quqyq qorǵaý konventsııalarynyń tolyq quqyqty qatysýshysy ekeni de sóz boldy.

Kezdesýde parlamentaralyq baılanysty jandandyrý máselesi de talqylandy.

«Biz parlamentaralyq yntymaqtastyqty damytýǵa basa mán berip kelemiz. Qazirgi tańda Eýroparlamentte saýda-ekonomıkalyq, ınvestıtsııalyq jáne gýmanıtarlyq baılanystardy damytýǵa yqpal etý úshin Qazaqstan men Eýroodaqtyń dostyq toby jumys isteıdi. Bul jumysty jandandyrý ekijaqty yntymaqtastyqty odan ári damytýǵa jáne parlamentaralyq baılanystardy nyǵaıtýǵa tyń serpin beredi dep senemiz», – dedi Asqar Shákirov.

Suhbat barysynda Ortalyq Azııadaǵy ózekti máseleler, onyń ishinde Aýǵanstandaǵy jaǵdaı da talqylandy.