Parlament Senatynda Ermek Jumabaevtyń tóraǵalyq etýimen «Óńir» depýtattyq tobynyń otyrysy boldy

dep habarlady Senattyń baspasóz qyzmeti.

Otyrys barysynda depýtattyq top jumysynyń josparyna sáıkes oblystar men respýblıka qalalary máslıhattarynyń qyzmet tájirıbesin zerdeleý jónindegi egjeı-tegjeıli ázirlengen materıaldy talqylady.

Otyrysty ashqan top jetekshisi E.Jumabaev bul taldaýdyń maqsaty  jergilikti ókildi organdardyń tájirıbesi men olardyń konstıtýtsııalyq ókilettikterin júzege asyrý barysynda  paıda bolatyn quqyqtyq erejelerdi qoldanýdyń ótkir máselelerin zerdeleý, sondaı-aq quqyqtyq erejelermen rettelmegen olqylyqtardy tabý bolyp tabylatynyn atap ótti.

Talqylaý barysynda top músheleri tarapynan sońǵy kezderde memleket qurylysyndaǵy máslıhattardyń róli men ornyna zor kóńil bólinip kele jatqany aıtyldy. Ózderiniń konstıtýtsııalyq ókilettikterin paıdalana otyryp olar jergilikti jerlerdegi memlekettik saıasatty júzege asyryp keledi, ortalyq pen el aımaqtary arasyn baılanystyra otyryp, qalalar men aýdandardaǵy áleýmettik-ekonomıkalyq úderisterge naqty yqpal etýde.

Máslıhattardyń, turaqty jáne tekserýshi komıssııalardyń, depýtattyq birlestikterdiń qyzmetin uıymdastyrýdaǵy ózekti máseleler boıynsha «Óńir» depýtattyq tobynyń músheleri Jumabek Tóregeldınov, Nurlyǵaıym Joldasbaeva, Baqbergen Dosmanbetov, Serik Aqylbaı, Qaısar Omarov, Qýanysh Aıtahanov jáne basqalar pikir almasty. Senator Tasbaı Sımambaev máslıhattarmen ózara  is-qımyl jumystary jónindegi tájirıbesi týraly oılaryn ortaǵa saldy.

Egjeı-tegjeıli ázirlengen taldamalyq qujattardy talqylaýǵa Senat Tóraǵasynyń orynbasary Aleksandr Sýdın de qatysty. Ol depýtattyq top atqarǵan jumystardyń mańyzy zor ekenin jáne jergilikti ókildi organdardyń is júzindegi jumystaryn jetildirý úshin bul taldaýdyń paıdalylyǵyn atap ótti.