Parlament Senaty jumyldyrý daıyndyǵy týraly zań jobasyn Májiliske qaıtardy
ASTANA. Sáýirdiń 9-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jumyldyrý daıyndyǵy jáne jumyldyrý máseleleri boıynsha ózgerister men tolyqtyrýlar engizý týraly» zań jobasyn talqylap,
ózgerister engizilgendikten qujatty Májiliske qaıtardy, dep habarlaıdy QazAqparat.
Atalǵan zań jobasynyń basty maqsaty elimizdegi jumyldyrý daıyndyǵy men jumyldyrý júıesin jetildirý bolyp tabylady. Osyǵan oraı, zań jobasymen QR Prezıdentiniń, QR Úkimetiniń, ýákiletti organnyń, QR memlekettik organdary men uıymdarynyń jumyldyrý daıyndyǵy men jumyldyrý salasyndaǵy quziretin naqtylý bóligine jáne olardyń arajigin ajyratý boıynsha ózgerister engiziletin bolady. Atap aıtqanda, QR Prezıdentiniń osy salaǵa qatysty ókilettiligi naqtylanyp, el Úkimetiniń jáne jumyldyrý daıyndyǵy salasyndaǵy ýákiletti organnyń ókilettikteri naqtylanyp, barlyq deńgeıdegi jergilikti atqarýshy organdardyń arajigi qaıta qarastyrylady. Qujatta tabıǵı jáne tehnogendik sıpattaǵy tótenshe jaǵdaılardy joıý jóninde aldyńǵy kezektegi sharalardy qabyldaý kózdeledi. Budan basqa, gýmanıtarlyq járdem kórsetý úshin jumyldyrý rezervin beıbit kezde paıdalaný múmkindikterin qarastyrý usynylyp otyr.
Parlament Senaty Májilis maquldaǵan zań jobasynyń ishki úılesimin qamtamasyz etýge, normalardy naqtylaýǵa, sondaı-aq zańnamalyq tehnıkalyq erejelerimen sáıkes keltirýge baǵyttalǵan túzetýler engizdi.
