Parlament Senaty Qyrǵyzstandaǵy ótkizý pýnkterine qatysty zańdy qabyldady

NUR-SULTAN. QazAqparat – Senattyń jalpy otyrysynda «2014 jylǵy 29 mamyrdaǵy EAEO týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń EAEO týraly shartty, EAEO quqyǵyna kiretin jekelegen halyqaralyq sharttardy jáne EAEO organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Qyrǵyz Respýblıkasy eki jyl ishinde úshinshi eldermen shekaradan ótkizý pýnktterin ornalastyrý jáne materıaldyq-tehnıkalyq jaraqtandyrýdy qamtamasyz etý mindettemesin aldy. Merzimderdi uzartý boıynsha Qyrǵyz tarapy bastama jasady. Ótkizý pýnktterin jańǵyrtý jumystaryn aıaqtaý úshin olarǵa qosymsha ýaqyt qajet bolyp tur», - dep túsindirdi Premer-Mınıstrdiń birinshi orynbasary - Qarjy mınıstri Álıhan Smaıylov.

Atap aıtqanda, memleketterdiń basshylary Joǵarǵy Eýrazııalyq ekonomıkalyq keńes otyrysynyń aıasynda (4.05.2018 j. Sochı qalasy) «24 aıdan» «48 aıǵa», ıaǵnı 2019 jyldyń 12 tamyzyna deıin ózgeris engizý týraly Hattamaǵa qol qoıdy.

«Degenmen, bul merzimde de Qyrǵyz tarapy úlgergen joq. Osyǵan oraı 2019 jylǵy 29 mamyrda Nur-Sultan qalasynda memleketterdiń basshylary Joǵarǵy Eýrazııalyq ekonomıkalyq keńes otyrysynyń aıasynda «48 aıdan» «72 aıǵa», ıaǵnı 2021 jyldyń 12 tamyzyna deıin ózgeris engizý týraly Hattamaǵa qol qoıdy. Alaıda bul jaqyn arada Sizderdiń qaraýlaryńyzǵa engiziletin basqa Hattamanyń nysany bolady. Hattamany ratıfıkatsııalaý Qazaqstan tarapy úshin eshqandaı saldarlarǵa ákep soqtyrmaıdy jáne ózgeris engizý zańdy sıpatqa ıe», - dedi Á. Smaıylov.