Parlament saılaýynda tergeý ızolıatoryndaǵy 5 myń adam daýys beredi
NUR-SULTAN. QazAqparat –Qazaqstannyń qylmystyq-atqarý júıesindegi 16 tergeý ızolıatorynda tergeý-qamaýynda otyrǵan 5 myńnan astam adam búgin QR Parlamentiniń saılaýynda daýys berýge qatysady, dep habarlaıdy QazAqparat.
«Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes tergeý ızolıatorlarynda ustalatyn, úkimi zańdy kúshine enbegen elimiz azamattary jalpyǵa birdeı saılaý quqyǵyna ıe.
Osy rette, qazir tergeý-qamaýynda otyrǵan respýblıkanyń qylmystyq-atqarý júıesiniń 16 tergeý ızolıatorynda jabyq saılaý ýchaskeleri quryldy.
«Onda 5 myńnan astam adam Qazaqstan Respýblıkasynyń kezekti Parlamenttik saılaýynda daýys berýge qatysyp jatyr.
Saılaý protsesi ótetin oryndarda tıisti baqylaý, kúzet jáne qadaǵalaý qamtamasyz etilgen.
Saılaý protsesine qatysýshylar barlyq qajetti sanıtarııalyq-epıdemııaǵa qarsy talaptardy saqtaýda.
Bıylǵy 5 qańtardaǵy jaǵdaı boıynsha «qyzyl» jáne «sary» aımaqtarda bolǵan óńirlerde saılaý komıssııasynyń barlyq músheleri, onyń ishinde baıqaýshylar aldyn ala PTR-ádisimen COVID-19-ǵa zerthanalyq tekserýden ótti.
Sonymen qatar, jabyq saılaý ýchaskelerine kirý tergeý ızolıatorlarynyń qyzmetin reglamentteıtin normatıvtik quqyqtyq aktilerge jáne «Qazaqstan Respýblıkasyndaǵy saılaý týraly» Konstıtýtsııalyq zańyna sáıkes júrgizildi», - dedi QR ІІM Qylmystyq-atqarý júıesi komıtetinen.
Málim etilgendeı, qazirgi ýaqytta respýblıkanyń tergeý ızolıatorlarynda 5 myńnan astam adam bar.
