Parlament saılaýy: Ózbekstanda elektrondyq daýys berý júıesi engiziledi
TAShKENT. KAZINFORM — 27 qazanda Ózbekstanda ótetin parlament saılaýyna qyzý daıyndyq júrip jatyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Saıası doda qarsańynda Ortalyq saılaý komıssııasynyń kezekti otyrysy ótti. Onyń barysynda el tarıhynda tuńǵysh ret saılaýshylarǵa qolaıly jaǵdaı jasaý maqsatynda jekelegen saılaý ýchaskelerinde elektrondyq daýys berý protsesin uıymdastyrý máselesi qaraldy.
Bıyl parlament saılaýynda synaqtan ótkizý josparlanǵan elektrondyq daýys berý qurylǵylarynyń 37-si buǵan deıin AQSh, Germanııa, Ulybrıtanııa, Italııa, Brazılııa, Sıngapýr jáne Avstralııa sııaqty elderde qoldanylǵan. Onyń kómegimen búginge deıin 6,5 mıllıardtan astam saılaýshy daýys berip úlgerdi.
Elektrondyq daýys berý tańdaý jasaý protsesin jedeldetýge, saılaý nátıjesin tez arada shyǵarýǵa jáne komıssııalardyń jumysyn ońtaılandyrýǵa yqpal etpek.
Osyǵan baılanysty ÓR Ortalyq saılaý komıssııasy saılaý kúni Tashkent qalasynyń aýmaǵynda ornalasqan keıbir ýchaskelerde elektrondyq daýys berý protsesin synaqtan ótkizý týraly qaýly qabyldady.
Atalǵan qujat negizinde daýys berýge arnalǵan elektrondyq qurylǵylardyń kómegimen saılaý bıýlletenin toltyrý tártibi de bekitildi.
Sonymen qatar, ýchaskelerde elektrondyq daýys berý protsesin baqylap otyrý úshin onlaın-translıatsııa júrgiziledi.
Eske salaıyq, parlament saılaýy kúni túrli sebepterge baılanysty turǵylyqty jerinde bola almaıtyn ózbekstandyqtar úshin merziminen buryn daýys berý 16-23 qazan aralyǵynda uıymdastyrylady.
Sondaı-aq, Ózbekstandaǵy bıylǵy parlament saılaýy aralas júıe negizinde ótedi.
