Parlament saılaýy Qyrǵyzstan prezıdentiniń jeke baqylaýynda
BІShKEK. KAZINFORM – Qyrǵyzstannyń Saılaý jáne referendýmdar jónindegi ortalyq komıssııasy zańnyń buzylýyna jol bergen jekelegen kandıdattarǵa qatysty shara qoldana bastady, dep habarlaıdy Kazinform menshikti tilshisi.
OSK tóraǵasy Tynchtyq Shaınazarov saılaý protsesine qatysýshylardyń barlyǵyna komıssııa saılaýshylardy para berýge, zańsyz úgit ádisterin qoldanýǵa nemese basqa saılaý qatysýshylardyń ar-namysy men qadir-qasıetine nuqsan keltiretin kez kelgen áreketterge jol bermeıtinin eskertti.
- Qyrǵyz Respýblıkasy Jogorký Keneshi depýtattarynyń kezekten tys saılaýyn ótkizý prezıdent Sadyr Japarovtyń jeke baqylaýynda. Memleket basshysy saılaýdyń ádil, ashyq jáne zańǵa sáıkes ótýine erekshe mán berip otyr, - dep atap ótti ol.
OSK barlyq kandıdattar men olardyń jaqtastaryna úgit-nasıhat jumystary qatań zań sheńberinde júrgizilýi kerektigin eske saldy. Zańbuzýshylyqtar anyqtalǵan jaǵdaıda qatań sharalar qoldanylady, kandıdatty tirkeýden alyp tastaýy da múmkin.
- Zań aldynda barlyǵy teń. Ortalyq saılaý komıssııasy belgilengen erejelerdi buzǵan kez kelgen adamǵa – kandıdatqa, onyń shtabyna nemese jala jabý men teris aqparat taratatyn jeke tulǵalarǵa óz ókilettikteri sheginde shara qoldanady, - dep málimdedi OSK tóraǵasy.
Eske sala ketsek, Qyrǵyz Respýblıkasy Prezıdentiniń 30 qyrkúıektegi jarlyǵymen Jogorký Kenesh depýtattarynyń merziminen buryn saılaýy 2025 jyldyń 30 qarashasy, jeksenbi kúni ótkiziletin bolyp bekitildi.
Qyrǵyzstandaǵy parlament saılaýyna 467 kandıdat tirkeldi.
Al Qyrǵyzstan Respýblıkasynyń Saılaý jáne referendýmdar jónindegi ortalyq komıssııasy merziminen buryn parlamenttik saılaýǵa 127 halyqaralyq baıqaýshy akkredıttedi.
Qyrǵyz Respýblıkasynyń Saılaý jáne referendýmdar jónindegi ortalyq komıssııasy 5 qarashada Almaty, Taraz jáne Shymkent qalalarynda qosymsha úsh saılaý ýchaskesin qurý týraly qaýly qabyldady.
Buǵan deıin Qazaqstanda Qyrǵyz Respýblıkasynyń azamattary Astanadaǵy (QR-daǵy Qyrǵyzstan elshiligi), Almatydaǵy (QR-daǵy Qyrǵyzstannyń Bas konsýldyǵy) jáne Atyraý men Qaraǵandydaǵy ýchaskelerde daýys bere alatynyn habarlaǵan edik.
10 qarashadannn bastap Jogorký Kenesh depýtattarynyń merziminen buryn saılaýyna arnalǵan úgit naýqanynyń kezeńi bastaldy.
Buǵan deıin Qyrǵyzstanǵa parlamenttiń ózin-ózi taratýy ne úshin qajet ekenin jazǵan edik.