Parlament salyqtyq amnıstııaǵa baǵyttalǵan zańdy qabyldady

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasyn eki oqylymda talqylap, qabyldady. Endi qujat Memleket basshysynyń qol qoıýyna joldanady.

Parlament qabyldaǵan zańnyń maqsaty jaǵymdy kásipkerlik ortany jáne eldiń odan ári turaqty áleýmettik-ekonomıkalyq damýy úshin qolaıly jaǵdaı jasaý bolyp tabylady.

«Bıznesti damytý jáne onyń aýqymyn keńeıtý maqsatynda 2014 jyldyń 1 qańtaryndaǵy jaǵdaı boıynsha salyq tóleýshilerdiń jeke shottarynda esepte turǵan jáne 2014 jyldyń 1 qazandaǵy jaǵdaı boıynsha tólenbegen ósimpuldardyń somalaryn esepten shyǵarý, ósimpul men aıyppuldardan bosatý arqyly salyqtyq amnıstııa júrgizý usynylady. Bul rette salyqtyq amnıstııa respýblıkalyq monıtorıngte turǵan iri salyq tóleýshilerge, sondaı-aq jer qoınaýyn paıdalaný, oıyn bıznesi jáne aktsızdeletin taýarlardy óndirý salasynda qyzmet etetin salyq tóleýshilerge taralmaıdy»,- dedi Ulttyq ekonomıka mınıstri Erbolat Dosaev.

Onyń aıtýynsha, aýyl sharýashylyǵy taýarlaryn yntalandyrý jáne agroónerkásiptik keshendi damytý úshin birqatar normalar qarastyrylyp otyr. «Birinshiden, daıyndaý uıymdary óz ónimderin satqan kezde qosalqy jeke sharýashylyqtyń tabysyna bir jyldyq jalaqy mólsheriniń 24 eselengen eń tómengi mólsheri shegindegi jeke tabys salyǵyn tólýden bosatylady. Bul norma úsh jylǵa engiziledi. Ekinshiden, qosylǵan qun salyǵyn tólemeıtin qosalqy jeke sharýashylyqtar men sharýa qojalyqtary aýyl sharýashylyǵy ónimderin satyp alǵan kezde qosylǵan qun salyǵy sýbsıdııalanady. Bul 2020 jylǵa deıingi merzimge engiziledi. Úshinshiden, jer ýchaskelerin utymdy paıdalaný maqsatynda sharýa qojalyqtaryn qorshaǵan ortaǵa emıssııadan bosata otyryp, biryńǵaı jer salyǵynyń mólsherlemesin 1,5 esege, al arnaıy aýyl sharýashylyǵynyń taýar óndirýshi zańdy tulǵalar úshin jer salyǵynyń stavkasyn 5 esege arttyrý kózdeledi», - dedi E. Dosaev.

Budan bólek, EKSPO kórmesin ótkizý maqsatynda 2017 jylǵa deıin EKSPO-ny uıymdastyrý men ótkizý boıynsha qyzmetti júzege asyratyn zańdy tulǵalarǵa salyq salý obektilerin jalǵa berý kezinde jer salyǵyn jáne múlik salyǵynan bosatý kózdeledi. «Metropolıten» memlekettik kásiporny da múlik salyǵyn tóleýden bosatylady.