Parlament reformasy: Zań shyǵarý bastamasyna ıe organdar sany artady

ASTANA. KAZINFORM – Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda zań shyǵarý bastamasy bar organdar sany artatynyn aıtty.

- Zań shyǵarýǵa bastama jasaý quqyǵy QR Prezıdentine, Quryltaı depýtattaryna, Úkimetke, Qazaqstan halqy keńesine tıesili jáne tek Quryltaıda ǵana iske asyrylatyny kózdelgen. QR Prezıdentiniń zań jobalaryn qaraý basymdyǵyn aıqyndaýǵa quqyǵy jáne tıisti zań jobalary birinshi kezekte, eki aı ishinde qabyldanýǵa tıistigi týraly norma pysyqtalyp, naqtylandy. Quryltaı halyqtyń ómiri men densaýlyǵyna, Konstıtýtsııalyq qurylysqa, qoǵamdyq tártiptiń qorǵalýyna, eldiń ekonomıkalyq qaýipsizdigine qater tóndiretin jaǵdaılarda jedel den qoıý úshin Úkimettiń zań shyǵarý bastamasymen engizilgen zań jobalaryn jedel qaraýǵa tıis bolady, - dedi senator.

Al Quryltaı qabyldaǵan zań 10 kún ishinde Prezıdentke qol qoıýǵa usynylýy kerek.

- Quryltaıdyń zań jobasyn depýtattardyń kópshilik daýsymen tutastaı qabyldamaý quqyǵy bar. Bas tartylǵan zań qabyldanbady dep esepteledi jáne bastamashylarǵa qaıtarylady, - dedi Nurlan Beknazarov.

Aıta ketý kerek, bul aıtylyp otyrǵan normalardyń bári ázirge usynys qana. Normalardyń qaısysy qabyldanyp, qaısysy Ata zańǵa enbeıtinin referendým sheshedi.

Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr. 

Kazinform agenttiginiń qazaq jáne orys tilindegi Telegram arnasynda mátin translıatsııasy bolady.

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.