Parlament reformasy: Áıelderdiń 30% kvotasyn saqtap qalý usynyldy

ASTANA. KAZINFORM — «Ádil sóz» halyqaralyq qorynyń prezıdenti Qarlyǵash Jamanqulova Qyzylordada ótip jatqan V Ulttyq quryltaıda Paralmenttegi áıelder kvotasyn saqtaýdyń mańyzy jóninde pikir bildirdi.

Keshe Ulttyq quryltaıdyń «Azamattyq qoǵam» sektsııasynyń otyrysy ótip, 26 quryltaı múshesi óz usynystaryn ortaǵa salǵan.

— Parlamentti reformalaý jónindegi jumys tobynyń múshesi retinde onyń júıelik mańyzyn aıtpaı ketý múmkin emes. Qos palataly júıeden bir palataly modelge kóshý máselesi sarapshylar arasynda uzaq ýaqyt talqylanyp keledi jáne búginde keń qoǵamdyq qoldaýǵa ıe bolyp otyr. Osy oraıda partııalyq tizimderdegi áıelder kvotasyn saqtaýdy ótinish retinde aıtqym keledi, — dedi Qarlyǵash Jamanqulova Prezıdent qatysýymen ótip jatqan V Ulttyq quryltaıda.

Spıker sheshim qabyldaý júıesindegi áıelderdiń qatysýyn keńeıtý Memleket basshysy tarapynan dáıekti túrde qoldaý taýyp kele jatqanyn atap ótti.

— 2022 jylǵy saıası reformalar paketi aıasynda partııalyq tizimder men ókildi organdardaǵy kvotany zańnamalyq turǵydan bekitýdi ózińiz usynǵan edińiz. Áıelderdiń zań shyǵarýshy organdardaǵy turaqty qatysýy qabyldanatyn sheshimderdiń sapasyn arttyrady, kún tártibin keńeıtedi jáne ókildi ınstıtýttardyń legıtımdigin kúsheıtedi. Sondyqtan 2022 jyly ózińiz negizin qalaǵan saıası júıeni jańǵyrtý qaǵıdattarynyń ınstıtýtsıonaldyq turǵyda bekip, sabaqtastyǵyn qamtamasyz etý tetigi retinde áıelder kvotasyn 30% kóleminde saqtaýdy suraımyn, — dedi Q. Jamanqulova.

Aıta keteıik, Qyzylordada Memleket basshysy Qasym-Jomart Toqaevtyń qatysýymen Ulttyq quryltaıdyń besinshi otyrysy bastaldy. Quryltaıdaǵy talqylaýǵa tanymal memleket jáne qoǵam qaıratkerleri, saıası partııalardyń, úkimettik emes sektordyń, bıznes-qaýymdastyqtardyń, saraptamalyq qaýymdastyqtyń jáne oblystardyń qoǵamdyq keńesteriniń ókilderi qatysyp jatyr.