Parlament reformalardyń sapaly oryndalýy úshin jańa azamattardyń kelgenin qalady - sarapshy
ASTANA. QazAqparat - Májilis deptýttary QR Prezıdetine Májilisti merziminen buryn taratý týraly usynysy arqyly reformalardyń sapaly oryndalýyna jańa azamattardyń kelýin qalady. Búgin jýrnalısterge bergen suxbatynda QR Prezıdenti janyndaǵy "Qoǵamdyq kelisim" RMM ǵylymı-sarapshylyq qyzmetiniń jetekshisi Nurbek Shaıaxmetov osyndaı pikirmen bólisti.
"Bul saıası qadamnyń birqatar alǵysharttary men sebepteri bar. Sebebi Elbasy atap ótkenindeı, 2016 jyly jańa reformalardyń praktıkalyq kezeńi bastalady. Sondyqtan daıyndyq kezeńi aıaqtaldy. Oǵan osy parlamenttiń qosqan úlesin, tarıxı rólin, mıssııasyn kórsetti. Ult Josparynyń zańdyq negizin jasady. Depýtattardyń ózderi málimdegenindeı, olar 80-ge tarta zań jobalaryn daıyndaǵan. Endi olar reformalardyń sapaly ári sátti júzege asyrylýyna qyzmet etýi tıis", - dedi ol.
Onyń oıynsha, taǵy bir sebep, jańǵyrylý kezeńinde jańa turpattaǵy, jańa sapalyq deńgeıdegi qoǵamnyń jańǵyrýy qajettigi.
"Ol qoǵamnyń barlyq baǵytyna: ekonomıka, áleýmet, mádenıet, saıasat, zań shyǵarý salalary bolsyn, barlyq Qazaqstan azamattaryna baılanysty. Sondyqtan jańǵyrtý - ol úlken jaýapkershilikti talap etedi. Meniń oıymsha, parlamenttiń osy usynysy - jańǵyrýdyń úlken ishki talaptarynan týyndap otyr. Úshinshiden, eldiń birligi, qoǵamnyń yntymaǵy, qoǵamdyq kelisim - eń basty qundylyq. Parlament depýtattary, solardaǵy úsh fraktsııa osy qundylyqqa, ıaǵnı saıası kúresten, qoǵamnyń eń basty múddeleri, qundylyǵy olardyń saıası kózqarastarynan joǵary turǵandyǵyn kórsetti. Mine, úsh fraktsııa da osy bastamaǵa qoldaý bildirip, Elbasyna usynysty engizip otyr", - dep atap ótti N. Shaıaxmetov.
"Bul bastamanyń kelesi sebebi bar, ol - syrtqy faktor, álemdik daǵdarys jaǵdaıy. Ekonomıkalyq daǵdarystyń bizge de áseri tıip jatqandyǵyn bilemiz. Syrtqy faktor bolsyn, ishki ekonomıkalyq daǵdarys bolsyn, olardyń aldyn alý, naqty saıası-ekonomıkalyq, áleýmettik qadamdarmen daǵdarysty jeńildetý nemese ekonomıkanyń, eldiń damýyna jaǵdaılar jasaý úshin jańa azamattar kelýi tıis. Bul zań shyǵarý organdaryna da baılanysty. Osy turǵydan alyp qarastyrsaq, bul bastamanyń óz zańdylyǵy bar. Jańa Parlament aýyr júkti alyp ketetindeı jańa azamattardy jasaýy kerek. Ony árıne xalyq sheshedi. Zań shyǵarý organdarynda kimderdi kórgisi keledi, osy jaýapty sátti xalyqqa da qaldyryp otyr", - dep túıdi oıyn sarapshy.
Aıta keteıik, Májilis deptýttary QR Prezıdetine Májilisti merziminen buryn taratý jáne kezekten tys saılaý taǵaıyndaý týraly Jarlyǵyn qabyldaý týraly bastamany kótergen bolatyn.
