Parlament Prezıdent pen Vıtse-Prezıdenttiń quqyqtyq jaǵdaıyn aıqyndaıtyn Zań qabyldady
ASTANA. KAZINFORM — Búgin Parlament palatalarynyń birlesken otyrysynda «Qazaqstan Respýblıkasynyń Prezıdenti týraly» Konstıtýtsııalyq zań qabyldandy.
Qujat boıynsha baıandama jasaǵan Májilis depýtaty Únzıla Shapaqtyń aıtýynsha, «Qazaqstan Respýblıkasynyń Prezıdenti týraly» Qazaqstan Respýblıkasy Konstıtýtsııalyq zjobasy ústimizdegi jyldyń 15 naýryzda respýblıkalyq referendýmda qabyldanǵan Konstıtýtsııaǵa sáıkes ázirlendi. Zań jobasy Qazaqstan Respýblıkasynyń qoldanystaǵy zańnamasyna sáıkes Qazaqstan Respýblıkasy Prezıdentiniń arnaıy Joldaýymen Parlament Májilisiniń qaraýyna engizildi.
— Konstıtýtsııalyq zańynyń jobasy Qazaqstan Respýblıkasy Prezıdentiniń jáne Qazaqstan Respýblıkasy vıtse-prezıdentiniń quqyqtyq jaǵdaıyn aıqyndaıdy. Zań jobasy 8 taraýdan jáne 43 baptan turady jáne qoldanystaǵy Konstıtýtsııalyq zańmen belgilengen quqyqtyq retteýdiń negizgi qaǵıdattarynyń mırastyq sabaqtastyǵyn saqtap qaldy. Sonymen qatar, zań jobasyn 2026 jylǵy Konstıtýtsııanyń erejelerine beıimdeýden jáne jańa memlekettik bılik ınstıtýttaryn qurýǵa baılanysty normalardy engizýden basqa, aldyńǵy aktide túzilgen ótken normalar aıtarlyqtaı pysyqtalyp, redaktsııalyq turǵydan jaqsartyldy, — dedi ol.
Onyń atap ótýinshe, Qazaqstan Respýblıkasy Parlamenti Reglamentiniń 32-7-tarmaǵyna sáıkes birlesken komıssııa konstıtýtsııalyq zańynyń jobasy boıynsha Parlament Palatalarynyń turaqty komıtetteri men depýtattarynyń eskertýleri men usynystaryn qaraıdy jáne qorytady.
— Birlesken komıssııanyń qaraýyna depýtattar tarapynan usynystar túspedi. Mátin boıynsha túzetýler men eskertýler joq, zań jobasy bastapqy redaktsııada usynylǵan. Baıandalǵannyń negizinde «Qazaqstan Respýblıkasynyń Prezıdenti týraly» Qazaqstan Respýblıkasy Konstıtýtsııalyq zań jobasyn ekinshi oqylymda qabyldaý usynylady, — dedi Únzıla Shapaq.
Osydan keıin qos palata depýtattary atalǵan zań jobasyn ekinshi oqylymda biraýyzdan qabyldady.
Aıta keteıik, jıynda depýtattar konstıtýtsııalyq zań jobalaryn ekinshi oqylymda qaraıdy.
