Parlament pen Úkimet bıýdjettiń ashyqtyǵyn qamtamasyz etedi — Senat tóraǵasy
ASTANA. KAZINFORM — Búgin Senat tóraǵasy Máýlen Áshimbaev buqaralyq aqparat quraldaryna arnalǵan brıfıngte memlekettik organdardy bir-birine qarsy qoımaýǵa shaqyrdy. Ol Memleket basshysynyń tapsyrmalary aıasynda Parlament te, Úkimet te bıýdjet-salyq reformasyn júzege asyrý úshin birlesip jumys istep jatqanyn atap ótti.
Senat tóraǵasy parafıskaldyq tólemder týraly budan buryn Palata otyrysynda aıtylǵan pikirine oraı jýrnalısterdiń suraǵyna jaýap bere kelip, bıýdjettiń ashyqtyǵyn qamtamasyz etý úshin Úkimetpen birlese otyryp jumys júrgizilip jatqanyn tilge tıek etti.
— Búgin biz Úkimetpen óte tyǵyz jáne belsendi jumys istep jatqanymyzdy atap ótkim keledi. Prezıdentimiz Qasym-Jomart Kemeluly Toqaev bıýdjet jáne salyq salalaryn tıimdi reformalaý týraly ortaq mindet júktedi. Bul jerde biz Úkimetpen birge komandalyq jumys júrgizip jatyrmyz. Eshqandaı qarama-qaıshylyq joq. Eger bir jerde másele týyndasa, biz ony der kezinde kóteremiz. Parafıskaldyq tólemder týraly másele tek ótken jalpy otyrysta paıda bolǵan joq. Senat depýtattary osyǵan deıin bul jaıtty birneshe ret kótergen bolatyn. Oǵan deıin de qozǵalǵany esimde. Biraq, qazir salyq jáne bıýdjet reformalarynyń júzege asyrylýyna baılanysty osy máselege basa nazar aýdarylyp otyr. Osyǵan baılanysty Úkimetpen tyǵyz jumys isteıtinimizdi taǵy da atap ótkim keledi. Parlament iske asyrylyp jatqan salyq jáne bıýdjet reformalary úshin de jaýapty. Memleket basshysynyń tapsyrmalary aıasynda bıýdjet qarajatyn paıdalanýdyń ashyqtyǵy men tıimdiligin odan ári arttyra beremiz, — dedi Máýlen Áshimbaev.
Sondaı-aq Senat nóraǵasy Parlament pen Úkimettiń parafıskaldyq tólemder salasyndaǵy jáne olardyń tıimdiligin baǵalaý jónindegi birlesken keshendi jumysy kelesi jyldyń basynan bastalatynyna nazar aýdardy.
— Parlament qabyldaǵan jańa Bıýdjet kodeksine sáıkes, qańtardan bastap (2026 j.) Úkimet parafıskaldyq tólemderdi tekserý jónindegi jumysty bastaıdy. Ol bizdiń zańnamaǵa engizilgen. Birlesken aýqymdy ári júıeli jumys bastalady (Parlament pen Úkimet). Barlyq parafıskaldyq jáne basqa tólemderdi qaraý kerek: olardyń tıimdiligi, ashyqtyǵy, qoldanylýy jáne taǵy basqa. Aldaǵy ýaqytta jalpy baǵyt boıynsha, jalpy bıýdjet jáne salyq saıasaty aıasynda tıisti sheshimder qabyldanady. Úkimet elimizdiń bıýdjet qarajatyn paıdalanýdyń ashyqtyǵy men tıimdiligin arttyrýǵa nıetti jáne bul bizdiń ortaq baǵytymyz. Bul jerde eshkimdi qarama-qarsy qoıýdyń qajeti joq ekenin taǵy da atap ótkim keledi. Memlekettik organdardyń bári judyryqtaı jumylyp, Prezıdentimizdiń tapsyrmalary aıasynda jumys isteımiz, — dedi Máýlen Áshimbaev.
Budan buryn habarlanǵandaı, jaqynda Senat tóraǵasy keıbir tólemderden túsken qarajat baqylaýsyz qalyp otyrǵanyn aıtty.