Parlament pen Úkimettiń jaýapkershiligin kúsheıtý usynystary ázirlenedi - Qasym-Jomart Toqaev
ASTANA. QazAparat - 2017 jyly Parlament pen Úkimettiń jaýapkershiligin kúsheıtý máselesi jan-jaqty zerdelenedi.
Búgin QR Parlamenti Senatynyń Tóraǵasy Qasym-Jomart Toqaev osylaı málim, dep habarlaıdy QazAqparat.
«Qurmetti áriptester, Elbasy atap ótkendeı, biz el damýynyń kelesi 25 jyldyq kezeńine qadam bastyq. Prezıdent Táýelsizdigimizdiń 25 jyldyǵyna arnalǵan saltanatty jıynda sóılegen sózinde memleket damýynyń jańa satysyna kóshý jaǵdaıynda Parlament pen Úkimettiń jaýapkershiligin kúsheıtý máselesin kún tártibine qoıǵan bolatyn. Aldaǵy ýaqytta osy mańyzdy másele jan-jaqty tereń zerdelenip, tıisti zańdarǵa ózgerister engizý boıynsha usynystar ázirlenetin bolady. Senatorlar memlekettik basqarý júıesin odan ári jańǵyrtýdy kózdeıtin mańyzdy zań jobalarymen jumysty kásibı turǵydan júrgizetinine men kámil senemin»,-dep atap ótti Toqaev Senattyń jalpy otyrysynda.
Esterińizge sala keteıik, 15 jeltoqsanda Astanadaǵy Qazaqstan Táýelsizdiginiń 25 jyldyǵyna arnalǵan saltanatty jıynda Memleket basshysy Nursultan Nazarbaev bılik ókilettiligin qaıta úılestirý máselesin kótergen bolatyn.
«Jańa memleket qurý men reformalardyń eń aldymen kúshti prezıdenttik bılik arqyly ǵana qamtamasyz etiletinin Táýelsizdik tarıhy kórsetip berdi. Memleket damýynyń jańa satysy eldegi isterdiń jaǵdaıy úshin Parlament pen Úkimettiń jaýapkershiligin kúsheıtý máselesin kún tártibine qoıyp otyr. Qazaqstan bizdiń Konstıtýtsııamyzda kórsetilgendeı, prezıdenttik basqarý formasyndaǵy memleket bolǵan, qazir de solaı jáne alda da solaı bola beredi. Sonymen birge, ókilettilikterdi Prezıdent, Úkimet jáne Parlament arasynda bóliske salý máselesin qaraıtyn ýaqyt ta keldi. Arnaıy komıssııa osy máselelerdi zerttep, tıisti zańdarǵa, múmkin Konstıtýtsııaǵa da ózgerister engizý boıynsha usynys engizýi tıis», - dedi Memleket basshysy.
