Parlament pen Úkimet ǵımaratyna kirýge shekteý qoıyldy
NUR-SULTAN. QazAqparat – QR Úkimeti men Parlament ǵımaratyna kirýge ýaqytsha shekteý engizildi, dep habarlaıdy QazAqparat tilshisi.
«Qazaqstan Respýblıkasynyń Prezıdenti Q.Toqaevtyń «Qazaqstan Respýblıkasynda tótenshe jaǵdaı engizý týraly» Jarlyǵymen eldiń barlyq aýmaǵynda koronavırýstyń taralýyna qarsy is-qımyl jáne azamattardyń densaýlyǵy qaýipsizdigin qamtamasyz etý jónindegi aldyn alý sharalary kúsheıtilip otyr. Osyǵan baılanysty osy jyldyń 16 naýryzy men 15 sáýiri aralyǵynda Qazaqstan Respýblıkasy Parlamenti Senatynyń ǵımaratynda otyrystarǵa kelýshiler men qatysýshylar, sondaı-aq buqaralyq aqparat quraldarynyń ókilderi úshin shekteý engizildi», - delingen Senattyń Telegram paraqshasynda jarııalanǵan aqparatta.
Taratylǵan málimette Senatta ótetin is-sharalar palatanyń saıtynda jáne resmı akkaýnttarda onlaın rejimde kórsetiletini eskertilgen.
Sondaı-aq Májiliste koronavırýs ınfektsııasynyń taralýyna qarsy kúres úshin aldyn alý sharalary kúsheıtildi, alaıda depýtattardyń zańnamalyq jumys kestesi ózgergen joq.
Jumys toptary, profıldi komıtetterdiń otyrysy, kimet saǵaty, plenarlyq otyrystar bekitilgen kestege sáıkes júrip jatyr jáne ádettegideı, Májilis saıtynda onlaın rejimde kórsetilýde.
Sonymen qatar, týyndaǵan máselelerdi jan-jaqty pysyqtaý úshin Internet tehnologııalar qoldanylyp jatyr.
Sonymen qatar, 16 naýryz ben 15 sáýir aralyǵynda Úkimet úıi ǵımaratyna kelýshiler jáne keńeske qatysýshylar, sondaı-aq buqaralyq aqparat quraldarynyń ókilderi úshin shekteý engizilgeni belgili boldy.
«Úkimet otyrystary onlaın rejimde PrimeMinister.kz saıtynda jáne resmı akkaýnttarda taratylady. Sharalardyń translıatsııasy týraly aldyn ala habarlap otyramyz. Qosymsha aqparat alý úshin 74-59-72 telefon nómirine habarlasýǵa bolady», - dep málim etti Úkimettiń baspasóz qyzmetinen.
