Parlament pen «Atamekenniń» birlesken jumysy jemisti boldy - Nurlan Nyǵmatýlın
ASTANA. QazAqparat - Májilis tóraǵasy Nurlan Nyǵmatýlın depýtattyq korpýs pen «Atameken» UKP-niń birlesken jumysy jemisti bolǵanyn atap ótti, dep habarlaıdy QazAqparat.
Atap aıtqanda, búgin Májiliste depýtattardyń UKP basshylyǵymen kezdesýi barysynda qazaqstandyq bıznestiń ózekti problemalary talqylanyp, olardy sheshý boıynsha naqty usynystar jasaldy. Sonymen qatar otandyq bıznesti damytý baǵytynda depýtattardyń aldaǵy ýaqytta «Atameken» UKP-men birlesken jumysynyń negizgi qadamdary aıqyndaldy.
Osy oraıda salaǵa qatysty zań jobalary boıynsha jumysty Májilis jalǵastyra túsetinine toqtalǵan N. Nyǵmatýlın, «depýtattar «Atameken» palatasymen jáne Prezıdenttiń Bes áleýmettik bastamalaryn júzege asyrý boıynsha belsendi jumystardy jalǵastyrady. Bul taqyryp búginde ózekti bolyp otyr, sebebi osy sharalar el azamattarynyń ómirin jaqsartýǵa negizdelgen», - dedi.
Sóz sońynda Májilis tóraǵasy belsendi azamattyq ustanymy men depýtattyq korpýspen yntymaqtastyqqa daıyndyǵy úshin «Atameken» UKP basshylyǵyna alǵysyn aıtyp, otandyq bıznesti damytý men qoldaý baǵytyndaǵy jumystaryna sáttilik tiledi.
Aıta keteıik, búgin Májiliste «Atameken» UKP qyzmetiniń 5 jyldyq qorytyndysy boıynsha málimetter baıandaldy. Onda Ulttyq kásipkerler palatasynyń basqarma tóraǵasy Abylaı Myrzahmetov jáne onyń orynbasarlary sóz sóıledi.
Sonymen qatar «Atameken» UKP tóralqasynyń tóraǵasy Tımýr Qulybaev elimizdegi nesıelendirýge qatysty problemalardy atady.
Munymen qosa ol mindetti medıtsınalyq saqtandyrýǵa qatysty pikir bildirdi.
