Parlament Palatalarynyń spıkerleri Naýryzǵa arnalǵan merekelik is-sharalarǵa qatysty
ASTANA. KAZINFORM – Senat spıkeri Máýlen Áshimbaev pen Májilis tóraǵasy Erlan Qoshanov Naýryz meıramy aıasyndaǵy merekelik is-sharalarǵa qatysty.
Parlament palatalarynyń basshylary «EXPO» halyqaralyq kórme ortalyǵynyń aýmaǵynda ornalasqan Etnoaýylǵa bardy. Olar merekelik is-sharalarǵa qatysýshylarmen áńgimelesip, qazaq halqynyń ulttyq qundylyqtary týraly syr shertetin «Jeti Qazyna» golografııalyq kórmesin tamashalady.
Sonymen qatar Qoljazbalar jáne sırek kitaptar ulttyq ortalyǵynyń qundy muralary,
otandyq baspalar shyǵarǵan qazaq tilindegi álem jáne tól ádebıetimizdiń klassıkalyq týyndylary men qazirgi shyǵarmalar qoıylǵan taqyryptyq kitap ekspozıtsııasymen tanysty.
Interaktıvti sport oıyndary alańynda Parlament spıkerleri asyq atý, sadaq tartý, gir kóterý, arqan tartý, láńgi jáne qazaqsha kúres syndy ulttyq sport túrlerinen jarystarǵa qatysyp júrgen sportshylarmen kezdesti. Bul jerde olardyń nazaryna JI-fýtbol, vırtýaldy «Air Sadaq» jáne tsıfrlyq formattaǵy «Asyq atý» syndy jasandy ıntellekt engizilgen sporttyq oıyndar kórsetildi.
Etnoaýyl aýmaǵynda kúni boıy elorda qonaqtary men turǵyndaryna arnalǵan túrli ınteraktıvti is-sharalar, merekelik kontsertter josparlanǵan. Sondaı-aq jetekshi otandyq óndirýshilerdiń azyq-túlik jármeńkesi, kitap kórmesi, ulttyq sport túrlerinen jarystar ótedi. Munda otandyq dızaınerlerdiń Neoetnıkalyq stıldegi Fashion-aımaǵy, anımatorlary bar balalardyń oıyn alańdary da qarastyrylǵan.
Merekelik Etnoaýyl 23 naýryzǵa deıin ashyq.
