Parlament palatalarynyń birlesken otyrysynda Astananyń mártebesi týraly qujat talqylanady
ASTANA. KAZINFORM — Osy aptada QR Parlamentiniń qaraýyna «Qazaqstan Respýblıkasy astanasynyń mártebesi týraly» Konstıtýtsııalyq zań jobasy engizildi.
— Konstıtýtsııalyq zań jobasy Qazaqstannyń jańa Konstıtýtsııasynyń 2-babynyń 4-tarmaǵyn iske asyrý úshin ázirlengen. Zań jobasynda Astanadaǵy jergilikti memlekettik basqarýdyń erekshelikteri, máslıhat pen ákimdiktiń qala qurylysy, kóshi-qon, kólik jónindegi ókilettilikteri kózdelgen. Sondaı-aq Astananyń aýmaǵy men qala mańyndaǵy aımaǵyn, biryńǵaı sáýlettik kelbeti men dızaın-kodyn aıqyndaý usynylady. Osy oraıda Májilistiń Ekonomıkalyq reforma jáne óńirlik damý komıteti bul zań jobasyn Parlament reglamentine sáıkes qaraý úshin qabyldaýǵa daıyn, — dedi depýtat Nurtaı Sabılıanov Májilistiń jalpy otyrysynda.
Bul turǵyda osy zań jobasy boıynsha QR Parlamenti Palatalarynyń birlesken komıssııasynyń quramyna Májilis depýtattary saılandy.
Eske salsaq, buǵan deıin Májilis tóraǵasy Erlan Qoshanov jaqyn arada birqatar mańyzdy zań jobasy Parlament qaraýyna engiziletinin málimdegen edi.
Aıta keteıik, 17 naýryzda Memleket basshysy Qasym-Jomart Toqaev Qazaqstan Respýblıkasynyń Konstıtýtsııasyna jáne «2026 jylǵy 15 naýryzda qabyldanǵan Qazaqstan Respýblıkasynyń Konstıtýtsııasyn iske asyrý jónindegi sharalar týraly» Jarlyqqa qol qoıdy.
