Parlament palatalarynyń birlesken otyrysy: Quryltaı týraly zań qabyldandy
ASTANA. KAZINFORM — Búgin Parlament palatalarynyń birlesken otyrysynda «Qazaqstan Respýblıkasynyń Quryltaıy jáne onyń depýtattarynyń mártebesi týraly» Konstıtýtsııalyq Zańy ekinshi oqylymda qaralyp, qabyldandy.
Zańnyń basty maqsaty — bir palataly Quryltaıdyń konstıtýtsııalyq — quqyqtyq negizin bekitý. Qujatty bıylǵy 15 naýryzda Respýblıkalyq referendýmda qabyldanǵan elimizdiń jańa Ata zańy erejelerin iske asyrý maqsatynda Parlament depýtattary ázirledi.
Qujat Quryltaıdy uıymdastyrý jáne onyń qyzmetin quqyqtyq retteýge, onyń depýtattarynyń quqyqtyq mártebesin aıqyndaýǵa baǵyttalǵan.
— Qazaqstan Halyq Keńesi zań shyǵarý bastamasy quqyǵy sýbektileriniń qataryna kiredi, ol Quryltaıǵa tıisti sheshim engizý arqyly osy quqyqty iske asyrady. Memlekettik bıýdjetti qozǵaıtyn depýtattyq bastamalarǵa Qazaqstan Respýblıkasy Úkimetiniń qorytyndylaryn usyný merzimi konstıtýtsııalyq zań deńgeıinde 3 aı bolyp aıqyndaldy, — dedi Májilis depýtaty Marat Báshimov.
Quryltaı men Úkimet arasynda is-qımyl jasaýdyń kelesi tetikteri belgilendi:
— Úkimet múshelerin laýazymǵa taǵaıyndaý úshin kandıdatýralar boıynsha Quryltaımen konsýltatsııalar ótkizý;
— Úkimet múshesiniń óz qyzmetiniń máseleleri jónindegi eseptiń tártibi;
— Quryltaı otyrysyna Premer-mınıstrdiń Úkimet qyzmeti týraly baıandamasy;
— Úkimetke senimsizdik votýmyn bildirý tártibi aıqyndalady.
Zańǵa sáıkes, Quryltaıdyń quramy 145 depýtattan turady, olardyń ókildik merzimi — 5 jyl. Depýtattardyń jalpy sanynyń kópshilik daýsymen Quryltaı saılaıtyn Quryltaı tóraǵasynyń úsh orynbasary bolady.
Quryltaı Qazaqstan Respýblıkasynyń Prezıdentine Vıtse-Prezıdent, Premer-mınıstr, Konstıtýtsııalyq Sottyń sýdıalarynyń, Ortalyq saılaý komıssııasynyń jáne Qazaqstan Respýblıkasynyń Joǵary aýdıtorlyq palatasynyń músheleri laýazymdaryna taǵaıyndaýǵa kelisim beredi. Sonymen birge, Quryltaı depýtattaryna QR Prezıdentiniń usynýy boıynsha Qazaqstan Respýblıkasy Joǵarǵy Sotynyń sýdıalaryn saılaý jónindegi ókilettikter berý usynylady. Sondaı-aq, zań jobasynda depýtattyq ádep qaǵıdalary bekitiledi.
Eske salsaq, 8 mamyrda «Qazaqstan Respýblıkasynyń Quryltaıy jáne onyń depýtattarynyń mártebesi týraly» konstıtýtsııalyq zań jobasy birinshi oqylymda maquldandy.
