Parlament palatalarynyń birlesken otyrysy: Konstıtýtsııalyq Zań qabyldandy
ASTANA. KAZINFORM – Búgin elordada Parlament palatalarynyń birlesken otyrysynda «Qazaqstan Respýblıkasynyń keıbir konstıtýtsııalyq zańdaryna ózgerister men tolyqtyrýlar engizý týraly» QR Konstıtýtsııalyq Zańy ekinshi oqylymda qaralyp, qabyldandy.
«Konstıtýtsııalyq zań jobasy boıynsha qurylǵan birlesken komıssııa Parlament palatalarynyń turaqty komıtetteri men depýtattarynyń eskertýleri men usynystaryn qarap shyqty. Birlesken komıssııanyń qaraýyna júzden astam túzetýler kelip tústi. Onyń ishinen 60 túzetý qabyldandy. Qabyldanǵan usynystar men eskertýler myna máselelerge qatysty. Birinshiden, derbes kassatsııalyq sottar qurý boıynsha. Astana qalasynda úsh, ıaǵnı qylmystyq, azamattyq jáne ákimshilik ister boıynsha kassatsııalyq sottar qurylady. Konstıtýtsııalyq zań jobasy aıasynda kassatsııalyq sottardyń ókilettikteri, qurylymy men quramy aıqyndalyp, olardyń sýdıalary men tóraǵalaryna qoıylatyn talaptar belgilendi. Sýdıalar úshin keminde 18 jyl zańgerlik ótili nemese keminde 8 jyl sýdıalyq ótili, onyń ishinde úsh jyl oblystyq sottyń sýdıasy bolyp jumys isteýi qajet bolady. Al kassatsııalyq sottyń tóraǵasy úshin sýdıa laýazymynda keminde 10 jyl jumys ótili, onyń ishinde oblystyq sottyń sýdıasy retinde 5 jyl jumys ótili talap etiledi», - dedi Májilis depýtaty Snejanna Imasheva.
Ekinshiden, kassatsııalyq sottardyń qurylýyna baılanysty Sot jıýrıiniń quramy qaıta qaralyp, endi ol 13 sýdıadan jáne zań salasyndaǵy qoǵamdastyqtyń 2 ókilinen turady. Sonymen qatar Sot tóreliginiń sapasy jónindegi komıssııanyń quramy da qaıta qaraldy. Endi onyń quramyna 9 jumys istep júrgen sýdıa jáne otstavkadaǵy eki sýdıa kiredi. Úshinshiden, QR Konstıtýtsııalyq Sotynyń 2023 jylǵy 6 jeltoqsandaǵy № 36 normatıvtik qaýlysyn iske asyrý maqsatynda, sot isteri men materıaldaryn qaraý kezinde zańdylyqty óreskel buzǵany úshin sýdıany tártiptik jaýapkershilikke tartý máselesi boıynsha normalar qabyldandy. Budan basqa, «zańdylyqty óreskel buzý» degen uǵymnyń ózi naqtylandy.
«Sonymen qatar birlesken komıssııa Qazaqstan Respýblıkasynyń basqa da konstıtýtsııalyq zańdaryn ózgertý týraly usynystardy qarady. Máselen, «Respýblıkalyq referendým týraly» Konstıtýtsııalyq zańnyń keıbir normalary «Qazaqstan Respýblıkasyndaǵy saılaý týraly» Konstıtýtsııalyq zańynda belgilengen talaptarǵa sáıkes keltirildi. Bul normalar saıası partııalar men uıymdardyń baıqaýshylaryna, sondaı-aq sheteldik jáne otandyq buqaralyq aqparat quraldary ókilderiniń referendým ótkizý kezinde qatysý múmkindikteri men olardy akkredıtteý tártibine qatysty. Munymen qosa, referendým komıssııasynyń sheshimderi men áreketterine shaǵym jasaýǵa jáne basqa da rásimdik máselelerge qatysty normalar qabyldandy», - dedi depýtat.
Budan bólek, «Qazaqstan Respýblıkasynyń Úkimeti týraly» Konstıtýtsııalyq zańǵa:
– memlekettik baǵdarlamalardy bekitý jónindegi quzyretpen tolyqtyrý;
– Úkimet músheleriniń tıisti salalarda memlekettik saıasatty qalyptastyrýdy qamtamasyz etýi boıynsha ózgerister engizildi.
«Atap aıtqanda, «Qazaqstan Respýblıkasynyń Prezıdenti týraly» QR Konstıtýtsııalyq zańy Prezıdenttiń memlekettik josparlaý júıesin kelisý týraly ókilettigimen tolyqtyryldy. Zań jobasymen jumys isteý barysynda basqa da konstıtýtsııalyq zańdarǵa túzetýler engizilgendikten, zań jobasynyń taqyrybyn ózgertý týraly sheshim qabyldandy. Budan basqa, quqyqtyq olqylyqtardy joıýǵa, Konstıtýtsııalyq zań jobasy normalarynyń ishki sáıkestigin qamtamasyz etýge baǵyttalǵan túzetýler, sondaı-aq ony qoldanystaǵy zańnamalyq aktilerge sáıkes keltirý maqsatynda redaktsııalyq jáne naqtylaý sıpatyndaǵy túzetýler engizildi», - dedi S. Imasheva.
