Parlament palatalarynyń birlesken otyrysy: «Halyq keńesi» men Astananyń mártebesi qaralady
ASTANA.KAZINFORM – Búgin elordada Parlament palatalarynyń birlesken otyrysy bastaldy.
Atap aıtqanda, depýtattar «Qazaqstan Halyq Keńesi týraly», «Qazaqstan Respýblıkasy astanasynyń mártebesi týraly», «Qazaqstan Respýblıkasynyń ákimshilik-aýmaqtyq qurylysy týraly» jańadan úsh konstıtýtsııalyq zań jobasyn birinshi oqylymda qaraıdy.
Ákimshilik-aýmaqtyq qurylysy týraly Konstıtýtsııalyq zań jobasy Qazaqstannyń jańa Konstıtýttsııasynyń 2-babynyń 3-tarmaǵyn iske asyrý maqsatynda ázirlendi. Zań jobasy Qazaqstan Respýblıkasynyń ákimshilik-aýmaqtyq qurylymynyń negizgi uǵymdaryn, maqsattaryn, mindetteri men qaǵıdattaryn aıqyndaıdy, sondaı-aq ákimshilik-aýmaqtyq qurylymdar máselelerin sheshý kezinde memlekettik organdardyń ókilettigin ajyratýǵa baǵyttalǵan.
Al el astanasynyń mártebesi týraly qujat Qazaqstannyń jańa Konstıtýtsııasynyń 2-babynyń 4-tarmaǵyn iske asyrý úshin ázirlengen. Zań jobasynda Astanadaǵy jergilikti memlekettik basqarýdyń erekshelikteri, máslıhat pen ákimdiktiń qala qurylysy, kóshi-qon, kólik jónindegi ókilettilikteri kózdelgen. Sondaı-aq Astananyń aýmaǵy men qala mańyndaǵy aımaǵyn, biryńǵaı sáýlettik kelbeti men dızaın-kodyn aıqyndaý usynyldy.
«Qazaqstan Halyq Keńesi týraly» zań jobasy da jańa Konstıtýtsııa normalaryn iske asyrý maqsatynda ázirlendi. Joba qoǵamdyq kelisimdi nyǵaıtýǵa, memleket pen qoǵam arasynda dıalogty qamtamasyz etýge baǵyttalǵan. Zań jobasynda Qazaqstan Halyq keńesiniń quqyqtyq mártebesi, onyń ókilettikteri, quramy jáne jumys tártibi aıqyndalady.
Buǵan deıin Májilis tóraǵasy Erlan Qoshanov jaqyn arada birqatar mańyzdy zań jobasy Parlament qaraýyna engiziletinin málimdegen edi.
Eske salsaq, 8 mamyrda ótken birlesken otyrysta Prezıdent, Quryltaı, sondaı-aq «Qazaqstan Respýblıkasyndaǵy saılaý týraly» Konstıtýtsııalyq zańyna ózgerister men tolyqtyrýlar engizý týraly» jańadan úsh konstıtýtsııalyq zań jobasy birinshi oqylymda qaraldy.
