Parlament palatalarynyń birlesken otyrysy bastaldy: úsh zań jobasy qaralady
ASTANA.KAZINFORM – Búgin elordada Parlament palatalarynyń birlesken otyrysy bastaldy.
Buǵan deıin Májilis tóraǵasy Erlan Qoshanov jaqyn arada birqatar mańyzdy zań jobasy Parlament qaraýyna engiziletinin málimdegen edi.
Búgingi birleske otyrysta Prezıdent, Quryltaı, sondaı-aq «Qazaqstan Respýblıkasyndaǵy saılaý týraly» Konstıtýtsııalyq zańyna ózgerister men tolyqtyrýlar engizý týraly» jańadan úsh konstıtýtsııalyq zań jobasy birinshi oqylymda qaralady.
Atap aıtqanda, «Qazaqstan Respýblıkasynyń Quryltaıy jáne onyń depýtattarynyń mártebesi týraly» Konstıtýtsııalyq zań jobasyn bıylǵy 15 naýryzda Respýblıkalyq referendýmda qabyldanǵan elimizdiń jańa Ata zańy erejelerin iske asyrý maqsatynda Parlament depýtattary ázirledi. Qujat Quryltaıdy uıymdastyrý jáne onyń qyzmetin quqyqtyq retteýge, onyń depýtattarynyń quqyqtyq mártebesin aıqyndaýǵa baǵyttalǵan.
Al «Qazaqstan Respýblıkasynyń Prezıdenti týraly» Konstıtýtsııalyq zań jobasy da referendýmda qabyldanǵan Konstıtýtsııaǵa sáıkes ázirlendi. Zań jobasy Qazaqstan Respýblıkasynyń qoldanystaǵy zańnamasyna sáıkes Prezıdenttiń zańnamalyq bastamasy tártibimen, QR Memleket basshysynyń arnaıy joldaýymen Parlament qaraýyna engizildi. Konstıtýtsııalyq zań jobasy Prezıdenttiń jáne QR Vıtse-prezıdentiniń quqyqtyq jaǵdaıyn aıqyndaıdy.
Budan buryn habarlanǵandaı, jaqynda Májilis tóraǵasy Erlan Qoshanov Qazaqstan Respýblıkasy Parlament Palatalarynyń birlesken otyrysyn shaqyrý týraly Ókimge qol qoıdy.
