Parlament palatalarynyń birlesken otyrysy bastaldy

ASTANA. KAZINFORM — Búgin elordada Parlament palatalarynyń birlesken otyrysy bastaldy. 

Jıynda Májilis pen Senat depýtattary «Alataý qalasynyń arnaýly mártebesi týraly» Qazaqstan Respýblıkasy Konstıtýtsııalyq zańynyń jobasyn birinshi oqylymda qaraıdy.

Aıta keteıik, 18 naýryzda Májilis tóraǵasy Erlan Qoshanov Qazaqstan Respýblıkasy Parlament Palatalarynyń birlesken otyrysyn shaqyrý týraly ókimge qol qoıdy. 

Eske salsaq, bıyl qańtar aıynda Parlament Májilisi «Alataý qalasynyń arnaýly mártebesi týraly» Konstıtýtsııalyq zańynyń jobasyn talqylaýǵa qabyldaǵanyn jazǵan edik.

Májilis depýtaty Nurtaı Sabılıanovtiń aıtýynsha, zań jobasy Memleket basshysynyń 2025 jylǵy 8 qyrkúıektegi Qazaqstan halqyna Joldaýyn iske asyrý maqsatynda ázirlendi. Zań jobasy Alataý qalasynyń ekonomıkalyq, tenhnologııalyq, ǵylymı bilim berý, saýda jáne ınvestıtsııalyq ortalyq retinde qalyptasýyna jaǵdaı jasaýǵa baǵyttalǵan. Sonymen qatar qujat jobasy Alataý qalasyn damytýǵa salynatyn ınvestıtsııalardyń kepildikteri men quqyqtyq qorǵalýyn arttyrýǵa, «aqyldy qala» qurý jáne Alataýdyń ekonomıkalyq damýy maqsatynda ǵylym men tehnıkanyń ozyq jetistikterin, tehnologııalyq ınnovatsııalardy, zamanaýı tásilder men tájirıbelerdi qoldanýǵa arnalǵan.