Parlament óz qyzmetiniń barysynda 1 myń 800-den astam zań qabyldady - R. Muqashev
ASTANA. 26 qańtar. QazAqparat /Qanat Mámetqazyuly/ - Parlament óz qyzmetiniń barysynda 1 myń 800-den astam zań qabyldady.
Búgin QR Parlamenti Májilisinde «Qazaqstan Respýblıkasynyń Parlamentine 15 jyl: qalyptasýy jáne damýy» degen taqyrypta ótken ǵylymı-praktıkalyq konferentsııa barysynda baıandama jasaǵan Zańnama jáne sot-quqyqtyq reforma komıtetiniń tóraǵasy Rahmet Muqashev osylaı málim etti.
«Buǵan deıin el parlamentarızm ınstıtýtyn odan saıyn damyta túsýge baǵyttalǵan iri ǵylymı-praktıkalyq konferentsııalar bolyp ótti. Bundaı sharalar zań shyǵarý bıliginiń damý qarqynyna oń septigin tıgizdi. Toqtala ketetin taǵy bir jaıt, kásibı Parlamenttiń 15 jyldyǵy barysynda saıası jańǵyrýlar evolıýtsııalyq úderispen júzege asty. Saıası partııalardyń zań shyǵarýshy bıliktiń qyzmetine aralasýy odan saıyn tereńdedi. Konstıtýtsııaǵa engizilgen sońǵy ózgeristerge sáıkes, aldaǵy saılaýlarǵa barlyq saıası kúshterdiń qatysýy, sondaı-aq kóppartııaly palatanyń bolý múmkindigi qarastyrylady. Bul rette kásibı Parlamenttiń ornyǵýy álemdik parlamenttik qurylystyń tájirıbesine negizdelgenin atap ótýimiz kerek», - dedi R. Muqashev.
