Parlament ósimdikter karantıni zańnamasyna engizilgen ózgeristerdi qabyldady
Atalǵan qujat ósimdikter karantıni salasy boıynsha quqyqtyq negizdi jetildirýge baǵyttalǵan. Atap aıtqanda, qujat boıynsha fıtosanıtarlyq táýekelderge taldaý jasaýdy zańnamalyq qamtamasyz etý, sol arqyly karantındik sharalardy jedel qabyldaý boıynsha ǵylymı negizder men sheshimder shyǵarý qarastyrylady. «Budan bólek, zańnamadaǵy ózgeristermen ósimdikter karantıni salasyndaǵy memlekettik mekemelerdi ońtaılandyrý kózdelip otyr. Sonymen birge ósimdikter karantıni boıynsha sharalardy qarjylandyrý naqtylanady», - dedi qujat boıynsha baıandaǵan aýyl sharýashylyǵy mınıstri Asyljan Mamytbekov. Onyń sózine qaraǵanda, fıtosanıtarlyq táýekelder taldaýyn mindetti túrde júrgizý ósimdikterdi qorǵaý men olardyń karantınin qamtamasyz etýdegi basty sharalardyń biri retinde qarastyrylyp otyr. Aıta keterligi, Qazaqstan Prezıdentiniń 2010 jylǵy 29 sáýirdegi Jarlyǵyna sáıkes Qazaqstan Respýblıkasy Ósimdikter karantıni jáne olardy qorǵaý jónindegi halyqaralyq konventsııaǵa qosyldy, soǵan sáıkes ósimdikter karantıni jáne olardy qorǵaý salasyndaǵy negizgi is-sharalardyń biri mindetti túrde fıtosanıtarlyq táýekelge taldaý júrgizý bolyp tabylady. «Soǵan oraı, zańnamada ósimdikter karantınin qamtamasyz etetin memlekettik mekemelerdi biriktirý kózdeledi. Sosyn qaıtadan qurylatyn memlekettik mekemege fıtosanıtarlyq táýekelder taldaýyn júrgizý boıynsha fýnktsııalar júkteledi. Al qazirgi ýaqytta zańnamada qamtylmaǵandyqtan, fıtosanıtarlyq táýekel boıynsha saraptamalar jańa karantındik nysandar tabylǵan ýaqytta ǵana jasalyp júr», - deıdi mınıstr A.Mamytbekov. Budan bólek, zań jobasymen pestıtsıdter, ýly hımıkattar qorlaryn saqtaý tártipterin ázirleıtin ýákiletti organnyń quzyreti bekitiledi.