Parlament «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» QR Zańyn qabyldady
ASTANA. 28 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» QR Zańy qabyldandy. Endi zań Memleket basshysy N. Nazarbaevtyń qol qoıýyna jiberiledi.
Esterińizge sala keteıik, qujat Memleket basshysy N. Nazarbaevtyń Qazaqstan halqyna 2006 jylǵy jáne 2010 jylǵy Joldaýlaryna sáıkes ázirlengen. Bul Joldaýlarda Elbasy Astanada erekshe qabyldaý sharttary men túlekterge qoıylatyn aıyryqsha talaptary bar bedeldi ınjenerlik-oqý ornyn qurý týraly mindetterin qoıǵan bolatyn. Budan bólek búgingi kúni qoldanystaǵy «Bilim týraly» zańda keń aýqymdy derbestigi men akademııalyq erkindigi, qamqorshylyq keńes arqyly basqarý júıesi, stýdentterdi qabyldaýdyń ózindik erejeleri kózdelmegen. Sondaı-aq qoldanystaǵy zańnamadan qazirgi zamanǵy bilim berý baǵdarlamalaryn, onyń ishinde álemniń jetekshi joǵary oqý oryndary sanatyndaǵy sheteldik áriptestermen birlesip bilim baǵdarlamalaryn engizý múmkindigi bar joǵarǵy oqý oryndaryn qurý jáne olardyń jumys isteý múmkindikteri qarastyrylmaǵan. Osyǵan baılanysty atalǵan zań jobasyn ázirleý ózekti ári ýaqytyly bolyp otyr. Atap aıtqanda, zań jobasy bilim berý salasynda jańa basqarý nysanyn engizýge, ınnovatsııalyq bilim berý baǵdarlamalary men ǵylymı jobalardy iske asyrýǵa qajetti. Ýnıversıtettiń jáne zııatkerlik mektepterdiń akademııalyq erkindigi men derbestigin damytýǵa baǵyttalady. Sondaı-aq, qujatta bilim berý salasynda eń úzdik álemdik praktıkany eskere otyryp, jańa bilim berý standarttaryn engizý úshin jaǵdaı jasalady.
Budan bólek, qabyldanǵan zań arqyly «Nazarbaev Ýnıversıteti» men mektepterine zaman talabyna saı oqý baǵdarlamalaryn ázirlep, synaqtan ótkizetin jáne úzdik tájirıbeni respýblıka kólemine tarata alatyn basymdy bilim oshaǵyna aınaldyrý mindeti júkteledi. Ýnıversıtet, Zııatkerlik mektepter men Qor úshin basqarýdyń jalǵyz joǵary organy - Ult kóshbasshysy basqaratyn joǵary qamqorshylyq keńes bolyp tabylady. Ýnıversıtettiń, zııatkerlik mektepter men qordyń basqarý organy - olardyń jekelegen qamqorshylyq keńesteri bolady. Aǵymdaǵy basshylyqty atqarýshy organ júzege asyrady. Zań jobasynyń tujyrymdamasyna sáıkes, úzdik halyqaralyq tájirıbege negizdelgen ýnıversıtetter men mektepterdi alqaly organ - qamqorshylyq keńestiń basqarýy zaman talabyna saı. Basqarýdyń atalǵan tájirıbesi Ulybrıtanııa, Avstralııa, Kanada, Shvetsııa, Fınlıandııa sekildi elderde keńinen taralǵan. Qamqorshylyq keńester joǵary oqý oryndary qyzmetiniń mańyzdy máseleleri boıynsha alqalyq sheshimder qabyldaıdy. Budan bólek, ýnıversıtetterde ártúrli máseleler boıynsha dekandar keńesi, akademııalyq keńes, ǵylymı keńes sekildi ózderiniń ishki keńesteri de bolady.
Bilim jáne ǵylym mınıstri Baqytjan Jumaǵulovtyń aıtýynsha, «Nazarbaev Ýnıversıteti» jáne «Nazarbaev Zııatkerlik mektepteri» týraly arnaıy zań qabyldaý arqyly atalǵan bilim oshaqtarynyń quqyqtyq negizi qalanady. Budan bólek elimizdegi barsha oqý oryndaryna jańa jaǵdaılar jasaýǵa múmkindik beredi.
