Parlament «Memlekettik múlik týraly» zańdy qabyldady
ANA. 26 qańtar. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Memlekettik múlik týraly» zań jobasyna Parlament Senaty tarapynan engizilgen túzetýlerdi talqylap, qujatty qabyldady. Endi Parlament qabyldaǵan zań Elbasynyń qol qoıýyna jiberiledi.
Esterińizge sala keteıik, buǵan deıingi palatanyń jalpy otyrysynda zań jobasyna qatysty senatorlardyń túzetýlerin áli de pysyqtaı túsý úshin qujatty Bas komıtetke qaıtarǵan bolatyn. Jalpy, zańnyń basty maqsaty - memlekettik múlikke memlekettik quqyqty júzege asyrý úderisinde qalyptasqan qatynastardy retteıtin memlekettik múlikti basqarýdyń quqyqtyq negizderin, qaǵıdattary men erejelerin aıqyndaıtyn zańnamalyq bazany jetildirý bolyp tabylady. Bul rette Memleket basshysy óz Joldaýynda osy zamanǵy ekonomıkalyq jaǵdaıda ózgerip otyrǵan memlekettiń rólin memlekettik aktıvterdi tıimdi basqarý problemalaryna jańa turǵydan qaraý qajettigin aıtqan bolatyn. Bulardy zańnama normasyna aınaldyrý qajettigin, sonyń ishinde memlekettik aktıvterdi basqarý týraly bólek zańnyń bolýy tıistigin alǵa tartqan edi.
Budan bólek, qujat jeke menshik pen memlekettik menshiktiń teń bolý qaǵıdaty saqtalǵan jaǵdaıda memlekettik basqarýshy tujyrymdamasyna negizdelgen. Sonymen qatar, zań jobasyn ázirleý negizgi úsh maqsatty qamtyǵan bolatyn. Atap aıtqanda, birinshiden - memlekettik menshiktiń jáne ózge de quqyqtardyń ıesi retinde memlekettik múlikke quqyqtardy tıimdi júzege asyrýdy qamtamasyz etý. Ekinshiden - memlekettik múlikti basqarýdy júzege asyratyn memlekettik organdar quziretiniń arajigin ajyratý jáne memlekettik organdar men olardyń basshylaryn memlekettik múlikti basqarý salasyndaǵy memlekettik saıasatty júrgizýdegi jaýapkershiligin arttyrý. Úshinshiden - ulttyq holdıngter men ulttyq kompanııalar arqyly memlekettik múlikti korporatıvtik basqarýdyń quqyqtyq negizderin, olardyń memlekettik organdarmen naqty qarym- qatynasyn qamtamasyz etýge jaýapkershiligin belgileý.
Senat jasaǵan túzetýler taǵy bir márte pysyqtalǵan soń, Bas komıtet qujatty qabyldaý týraly usynys jasap, palata depýtattary ony qoldady.
