Parlament memlekettik basqarý júıesin jetildirýge baǵyttalǵan zańdardy ýaqytyly qabyldaıdy – Máýlen Áshimbaev
«Búgingi jıyn óte mańyzdy taqyrypqa arnalyp otyr. Bizdiń elimiz qazirgi kezeńde memlekettik basqarýdyń ashyqtyǵy men tıimdiligin qamtamasyz etýge úlken mán berýde. Prezıdentimiz Qasym-Jomart Kemeluly Toqaev osy salaǵa erekshe nazar aýdaryp otyrǵanyn bilesizder. Bul baǵyttaǵy basymdyqtarymyzdy da belgilep berdi. Soǵan sáıkes, memlekettik basqarý júıesin bıýrokratııadan aryltýǵa jáne ortalyqsyzdandyrýǵa, sondaı-aq, memlekettik organdardyń ashyqtyǵyn qamtamasyz etýge, qyzmetshilerdiń biliktiligin arttyrýǵa arnalǵan is-sharalar júzege asyrylýda. Bul mindetter qoǵamnyń qajettilikterine sáıkes jáne tıimdi jumys isteıtin memlekettik apparat, sondaı-aq, tıisti protsedýralardy qalyptastyrýǵa baǵyttalyp otyr», - dedi Senat tóraǵasy «Ashyq úkimet jáne basqarýdyń jańa mádenıeti: estý, túsiný jáne áreket etý» halyqaralyq ǵylymı-tájirıbelik konerentsııada
Onyń atap ótýinshe, bul ońaı sharýa emes. Óıtkeni, memlekettik basqarý júıesi – aýqymdy ári kúrdeli mehanızm. Inertsııasy da az emes. Ony ózgertý saıası erik-jigerdi, ýaqytty jáne tabandylyqty talap etedi.
«Soǵan qaramastan osy salada kóptegen jumystar isteldi. Búginde ol jumystyń alǵashqy nátıjelerin de kórip otyrmyz. Memlekettik basqarý deńgeıleri arasyndaǵy ókilettikterdi bólýdiń jańa tujyrymdamasy júzege asyrylýda. Atap aıtqanda, memlekettik basqarý deńgeıleri arasynda 500-ge jýyq fýnktsııa qaıta bólindi. Ákimshilik reformanyń alǵashqy kezeńiniń ózinde Úkimettiń 471 fýnktsııasy ortalyq memlekettik organdarǵa berildi. Osy jumys aıasynda jaqynda Parlament 4 konstıtýtsııalyq zańǵa, 14 kodekske jáne 150 zańǵa túzetýler engizdi. Endigi kezeńde birshama quzyretter ortalyqtan jergilikti organdarǵa beriledi. Tıisti zańdardy aldaǵy aılarda qabyldaýdy josparlap otyrmyz. Jańa Bıýdjet kodeksin qarastyrǵan kezde de respýblıkalyq pen jergilikti bıýdjetaralyq qarym-qatynastyrdy qaıta qaraıtyn bolamyz. Jalpy, Parlament depýtattary memlekettik basqarý júıesin jetildirýge baǵyttalǵan zańdardy jan-jaqty pysyqtap, ýaqytyly qabyldaıtyn bolady»,- dedi Máýlen Áshimbaev.
.
