Parlament medıtsınalyq kómekke qatysty quqyqtardy qalpyna keltiretin zańdy qabyldady
ASTANA. 7 maýsym. QazAqparat - Búgin QR Parlamenti Cenatynyń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly zań jobasyn ekinshi oqylymda maquldap, qujatty qabyldady.
Endi atalǵan zań Memleket Basshysynyń qol qoıýyna jiberiledi.
Atalǵan qujattyń negizgi maqsaty Qazaqstan azamattary men oralmandarynyń tegin medıtsınalyq kómektiń kepildik berilgen kólemine kostıtýtsııalyq quqyqtaryn iske asyrýdy qamtamasyz etý bolyp tabylady. «Bul quqyq qazirgi ýaqytta eki zańmen rettelip júr.
Atap aıtqanda, olar: «Halyq densaýlyǵy jáne densaýlyq saqtaý júıesi týraly» Kodeksi jáne «Memlekettik satyp alýlar týraly» zańy. Bul turǵyda aıta ketetin jaıt, 2007 jyldan bastap qazirgi ýaqytqa deıin tegin medıtsınalyq kómektiń tizbesine kiretin medıtsınalyq qyzmetterdi satyp alýdy, medıtsınalyq maqsattaǵy buıymdar jáne dári-dármekterdi satyp alýdy zańnan tys erekshe tásilmin, Úkimet qaýlysymen júrgizip kelemiz. Alaıda, qalyptasqan tártip 1 shildeden bastap ózgerýi múmkin. Óıtkeni, osy arada Biryńǵaı ekonomıkalyq keńistik sheńberinde memlekettik satyp alý týraly kelisim qabyldanǵan bolatyn. Al sol kelisimge sáıkes tizbe jasalyp, oǵan jańaǵydaı medıtsınalyq qyzmetter, dárilik zattar engizilmegen. Sonymen qatar, 2012 jylǵy qańtardaǵy qabyldanǵan zańǵa ózgerister engizilgen bolatyn. Munyń bári qoldanystaǵy tártiptiń kúshin joıýǵa jáne halyqty tegin medıtsınalyq kómektiń kólemimen qamtamasyz etý qyzmetin júzege asyrýdy bolǵyzbaı tastaýy múmkin», - deıdi senator Svetlana Jalmaǵambetova.
Sondaı-aq, qoldanystaǵy zańnyń teris saldaryna toqtalǵan depýtat, kelisimniń «2009 jyly engizilgen biryńǵaı ulttyq densaýlyq saqtaý júıesine, onyń basty prıntspterine balta shabatynyn» atap ótti. «Ekinshiden, ol patsıenttiń birneshe quqyqtaryn buzylýyna ákeledi. Atap aıtqanda, medıtsınalyq kómekke qoljetimdiligi, patsıentterdiń klınıkany tańdaý quqyǵy, medıtsınalyq kómekti úzilissiz alý quqyǵyn buzady. Al búgin qabyldanǵan zań sondaı qaıshylyqtardy boldyrmaý úshin jasalyp otyr», - deıdi depýtat.
S. Jalmaǵambetovanyń túsindirýinshe, atalǵan zań bes jyldan beri Qazaqstandaǵy densaýlyq saqtaý júıesinde qalyptasqan tártipti saqtap qalý úshin engizilip otyr. «Halyqqa qyzmet etetin zańda basqasha ózgerister qamtylmaǵan», - dedi ol.
