Parlament Májilisinde alıment óndirip alý jónindegi qujat qaralady

ASTANA. KAZINFORM — Parlament Májilisiniń qaraýyna «1993 jylǵy 22 qańtardaǵy Azamattyq, otbasylyq jáne qylmystyq ister boıynsha quqyqtyq kómek pen quqyqtyq qatynastar týraly konventsııaǵa ózgerister engizý týraly hattamany ratıfıkatsııalaý týraly» zań jobasy engizildi.

- Atalǵan zań jobasy Qazaqstan Respýblıkasynyń «Halyqaralyq sharttar týraly» Zańyna sáıkes ázirlendi. Hattamada ýaǵdalasýshy taraptardyń aýmaqtarynda kámeletke tolmaǵan balalardyń paıdasyna alıment óndirip alý týraly sot buıryqtaryn taný jáne oryndaý bóliginde túzetýler kózdeledi. Bul normalar kámeletke tolmaǵan balalardyń quqyqtary men múddelerin qorǵaýdy qamtamasyz etýge baǵyttalǵan, - dedi Májilistiń Zańnama jáne sot-quqyqtyq reforma komıtetiniń tóraıymy Snejanna Imasheva palatanyń jalpy otyrysynda.

Sonymen qatar Májilistiń qaraýyna «2002 jylǵy 7 qazandaǵy Azamattyq, otbasylyq jáne qylmystyq ister boıynsha quqyqtyq kómek pen quqyqtyq qatynastar týraly konventsııaǵa ózgerister engizý týraly hattamany ratıfıkatsııalaý týraly» zań jobasy da engizildi.

- Bul zań jobasy bala quqyqtaryn qorǵaýdy qamtamasyz etýdegi TMD aýmaǵynda quqyqtyq yntymaqtastyqtyń tıimdiligin arttyrýǵa baǵyttalǵan. Atap aıtqanda, jasóspirim balalarǵa alıment óndirip alý týraly sot aktileri osy memleketter aýmaǵynda tanylyp, oryndalatyn bolady, - dedi S. Imasheva.

Buǵan deıin óńirlerde bala quqyqtaryn qorǵaý basqarmalary qurylatynyn jazǵan edik.