Parlament Májilisi medıtsınalyq zattarǵa qatysty qujatty qabyldady
ASTANA. KAZINFORM – Búgin Májilistiń jalpy otyrysynda «2014 jylǵy 23 jeltoqsandaǵy Eýrazııalyq ekonomıkalyq odaq sheńberinde medıtsınalyq buıymdar aınalysynyń biryńǵaı qaǵıdattary men qaǵıdalary týraly kelisimge ózgeris engizý týraly hattamany ratıfıkatsııalaý týraly» Zańy qabyldandy.
Hattamaǵa EAEO-ǵa múshe memleketterde tirkelgen medıtsınalyq zattardyń ımportyn qosa alǵanda, olardyń aınalymǵa shyǵarylýynyń toqtatylýyna baılanysty tapshylyqtyń týyndaý qaýpin boldyrmaý maqsatynda qol qoıyldy. Qujatqa sáıkes múshe memlekettiń ulttyq zańnamasynyń talaptary boıynsha medıtsınalyq buıymdardy tirkeý quqyǵyn berý 2025 jylǵy 31 jeltoqsanǵa deıin uzartylady.
Densaýlyq saqtaý mınıstri Ajar Ǵınııattyń aıtýynsha, Eýrazııalyq ekonomıkalyq komıssııa keńesi Eýrazııalyq ekonomıkalyq odaq aıasynda medıtsınalyq zattar aınalymynyń biryńǵaı qaǵıdattary men qaǵıdalary týraly kelisimge ózgerister engizý týraly 4 Hattamany maquldady.
2023 jyldyń basynda myna hattamalar qabyldandy:
- № 1 hattamany ratıfıkatsııalaý ulttyq rásim boıynsha berilgen merzimsiz tirkeý kýálikteri bar medıtsınalyq buıymdarǵa EAEO sheńberinde qaıta tirkemeı Qazaqstan Respýblıkasynyń aýmaǵynda erkin aınalysta bolýǵa múmkindik berdi.
- № 2 hattamany ratıfıkatsııalaý ulttyq tirkeýdi 2022 jylǵy 31 jeltoqsanǵa deıin uzartýǵa jáne ulttyq zańnama boıynsha jańa medıtsınalyq buıymdardy tirkeýge múmkindik berdi.
Atap aıtqanda, № 1 jáne № 2 hattamalardy ratıfıkatsııalaý týraly zańdarǵa Memleket basshysy 2023 jylǵy 6 aqpanda qol qoıdy.
Sonymen qatar, № 3 hattama qazir Eýrazııalyq ekonomıkalyq odaqqa múshe elderde kelisýi barysynda.
«Búgin ratıfıkatsııalaý úshin talqylaýǵa №4 hattama engizilip otyr. Qaralyp otyrǵan №4 hattamany ratıfıkatsııalaý jobasy ulttyq tirkeýdi 2025 jylǵy 31 jeltoqsanǵa deıin uzartýǵa jáne ulttyq zańnama boıynsha jańa medıtsınalyq buıymdardy tirkeýge múmkindik beredi. Qazir Qazaqstan Respýblıkasynda 1820 medıtsınalyq zatty óndiretin 118 otandyq óndirýshi bar. Ulttyq zańnama boıynsha 12 myńǵa jýyq medıtsınalyq buıym tirkelgen, olardy Eýrazııalyq ekonomıkalyq odaq aıasynda qaıta tirkeýdiń qajeti joq. Medıtsınalyq buıymdar otandyq naryǵyn saqtaý, sondaı-aq EAEO qaǵıdalary boıynsha medıtsınalyq buıymdardy tirkeýdiń tolyq aýysýyna daıyndalý úshin Eýrazııalyq ekonomıkalyq odaqqa múshe memleketter 2025 jylǵy 31 jeltoqsanǵa deıin ulttyq zańnama boıynsha jańa medıtsınalyq buıymdardy tirkeýge múmkindik beretin rásimdi uzartý týraly sheshim qabyldady. Búgingi kúni Hattama qol qoıylǵan sátten bastap ýaqytsha qoldanylýda. Atap aıtqanda, Qazaqstan Respýblıkasynyń naryǵynda jańa medıtsınalyq buıymdardy tirkeýge, qoldanýǵa múmkindik berý úshin osy hattamany ratıfıkatsııalaýdy qoldaýdy suraımyz», - dedi mınıstr.
