Parlament Májilisiniń bedelin odan ári kóterý úshin barlyq kúshimdi, bilimimdi, tájirıbemdi jumsaıtyn bolamyn - N.Nyǵmatýlın
ASTANA. 20 qańtar. QazAqparat /Aıdar Ospanalıev/ -«Búgin biz úshin erekshe tarıhı kún, sebebi Otanymyz - Qazaqstan ashyq jáne ádil saılaý ótkizip, búkil álem aldynda óziniń demokratııalyq el ekenin taǵy bir ret dáleldedi», - dedi búgin Parlament Májilisiniń jańa saılanǵan tóraǵasy Nurlan Nyǵmatýlın palatanyń jalpy otyrysynda.
«Maǵan senim bildirip, Májilis tóraǵasy sııaqty joǵary laýazymǵa saılaǵany úshin Májilis depýtattaryna alǵysymdy bildiremin. Memleket basshysynyń sózimen aıtsaq, «Parlament - Memlekettiń aınasy». Sondyqtan, joǵary zań shyǵarýshy organdy basqarý men úshin tek bıik mártebe ǵana emes, sonymen birge úlken senim men jaýapkershilik. Sol úshin aldaǵy ýaqytta Elbasymyz Nursultan Ábishuly Nazarbaevtyń jáne sizderdiń senimderińizdi aqtap, Parlament Májilisiniń bedelin odan ári kóterý jolynda barlyq kúshimdi, bilimimdi, tájirıbemdi jumsaıtyn bolamyn. Búgin biz úshin erekshe tarıhı kún, sebebi Qazaqstan ashyq jáne ádil saılaý ótkizip, búkil álem aldynda óziniń demokratııalyq el ekenin taǵy bir ret dáleldedi. Bizdiń táýelsiz elimizdiń tarıhynda alǵash ret úsh partııadan turatyn Májilis quramy bekitildi. Men barlyqtaryńyzdy osy jeńispen jańa onjyldyqtaǵy jańa Parlamenttiń depýtaty bolýlaryńyzben barshańyzdy quttyqtaımyn»,-dedi Májilis tóraǵasy.
Onyń sózinshe, Májilis saılaýynda «Nur Otan» partııasynyń jeńiske jetýi - qazaqstandyqtardyń Elbasynyń saıası, áleýmettik, ekonomıkalyq bastamalaryn qoldaıtyndyǵynyń, árqashanda Prezıdentpen jáne onyń partııasy «Nur Otanmen» birge ekendiginiń taǵy bir aıqyn kórsetkishi.
«Sonymen birge, bul búkil halqymyzdyń 20 jyl ishinde qol jetkizgen tabystar men jeńisterge, aldaǵy uly maqsattarǵa degen zor qurmeti ekeni sózsiz. Sondyqtan, Qazaqstan halqynyń birligin, beıbit ómirin, turaqtylyǵyn saqtaı otyryp, biz Prezıdentimizdiń strategııalyq mańyzdy josparlaryn odan ári tıimdi júzege asyrý jáne búgingi júktelgen tapsyrmalaryn oryndaý - elimizge, halqymyzǵa qajet sapaly zańdar qabyldaý jolynda aıanbaı eńbek etemiz dep senim bildirimen. Oǵan quramynda elimizge tanymal azamattar men belgili saıasatkerler jáne qoǵam qaıratkerleri bar kóppartııaly Májilisimizdiń depýtattarynyń bilimi de, qarym-qabileti de jetedi dep bilemin», - dep túıindedi N.Nyǵmatýlın.
