Parlament Májilisinde jeke qosalqy sharýashylyq týraly zań jobasy tanystyryldy
«Búgingi tańda elimizde shamamen 1,6 mln jeke qosalqy sharýashylyq bar. Olar 2020 jyldyń qorytyndysy boıynsha 2,6 trln teńgege aýyl sharýashylyǵy ónimin óndirdi nemese barlyq ónimniń 41,5%-yn qurady. Bul rette qyzmettiń bul túri jeke zańnamalyq aktimen rettelmegen, olardyń mártebesi anyqtalmaǵan. Shyn máninde, jeke qosalqy sharýashylyq jumysy zańnamalyq turǵyda negizdelmegen. Budan basqa, ishki azyq-túlik naryǵy qajettiliginiń basym úlesin qanaǵattandyra otyryp, jeke qosalqy sharýashylyqtar memlekettik qoldaý sharalarynan shektelip otyr. Jaıylymdyq jáne shabyndyq jerlerdiń tapshylyǵy, azyq-túliktiń ekonomıkalyq qoljetimsizdigi, ósirilgen ónimdi ádil baǵamen satý, materıaldyq-tehnıkalyq resýrstarmen qamtamasyz etý jáne basqa da máseleler sheshilmegen kúıinde qalyp otyr», - dep toqtaldy Aýyl sharýashylyǵy mınıstri Erbol Qarashókeev.
Onyń aıtýynsha, ekinshi jaǵynan, maldyń jartysyna jýyǵy jeke qosalqy sharýashylyǵynda ekenin umytpaý kerek. Shyn máninde, bul úlken bıologııalyq aktıv natýraldyq sharýashylyq deńgeıinde jumys isteıdi jáne eshqandaı tehnologııalyq protsestermen qamtylmaǵan.
«Degenmen bul jerde óndiristiń tıimdiligin arttyrýǵa jáne aýyl turǵyndarynyń ómir súrý deńgeıin arttyrý úshin qosymsha tabys alýǵa múmkindik beretin úlken áleýet bar. Joǵaryda atalǵan barlyq máselelerdi eskere otyryp jáne Memleket basshysynyń tapsyrmasyna sáıkes «Jeke qosalqy sharýashylyq týraly» zań jobasy ázirlendi. Bul jerde postkeńestik memleketterden (RF, Belarýs Respýblıkasy, Ózbekstan Respýblıkasy) tek Qazaqstanda ǵana jeke qosalqy sharýashylyqtyń qyzmetin retteıtin jeke zań joq ekenin atap ótkim keledi. Sonymen birge, taldaý nátıjesi kórsetkendeı, bul elderdegi jeke qosalqy sharýashylyq týraly zańdar negizinen kontýrlyq sıpatqa ıe jáne egjeı-tegjeılenbegen. Alaıda, ol eldermen salystyrǵanda, biz, naqty egjeı-tegjeıleı otyryp, naqtylaý jolymen júrdik», - dedi mınıstr.
«Birinshiden, zań jobasynda biz jeke qosalqy sharýashylyq uǵymyn beremiz, onyń mártebesin salyq salý máselelerin retteý úshin kásipkerlik emes qyzmet túri retinde anyqtaımyz, bul óte mańyzdy bolyp sanalady. Ekinshiden, biz jergilikti atqarýshy organdarǵa jeke qosalqy sharýashylyqtardy damytý úshin jaǵdaı jasaý bóliginde naqty qosymsha ókilettikter beremiz. Eń aldymen, bul jer zańnamasy aıasynda jaıylymdyq jáne shabyndyq jerlermen qamtamasyz etý, materıaldyq resýrstarmen jabdyqtaýdy uıymdastyrý, ósirilgen ónimdi ótkizý máselelerine qatysty. Olarǵa jergilikti bıýdjetterdiń múmkindigine qaraı jeke qosalqy sharýashylyqtardy damytýdyń problemalaryn sheshýge, olardyń kooperatıvteri úshin qajetti óndiristik ınfraqurylym qurýǵa quqyq beremiz. Jeke qosalqy sharýashylyqtardy damytý máseleleri boıynsha olardyń jaýapkershiligin kúsheıtemiz, osy másele boıynsha ákimderdiń aýyl turǵyndary aldyndaǵy esep berý normasyn engizemiz», - dedi vedomstvo basshysy.
Úshinshiden, olarǵa memlekettik qoldaý sharalaryn kórsetýdiń zańnamalyq negizi qalanady. Bul jumys jeke qosalqy sharýashylyqtar kooperatıvteri arqyly júrgiziledi.
«Osylaısha, osy Zań jobasyn qabyldaý jeke qosalqy sharýashylyqtardy júrgizý kezinde týyndaıtyn qatynastardy retteýge, jeke qosalqy sharýashylyqtardy kooperatsııa arqyly memlekettik qoldaý sharalaryna qol jetkizýge jáne osy negizde jeke qosalqy sharýashylyqtardyń tıimdiligin arttyrýǵa, sondaı-aq aýyl turǵyndarynyń ómir súrý deńgeıin kóterýge baǵyttalǵan zańnamalyq negiz qurýǵa múmkindik beredi», - dedi Erbol Qarashókeev.
