Parlament Májilisinde jaıylym máseleleri talqylandy
ASTANA. 20 qyrkúıek. QazAqparat - Búgin QR Parlamenti Májilisinde dóńgelek ústel otyrysy ótip, onda «Jaıylym týraly» zań jobasy talqylandy.
«Búgingi tańda Qazaqstandaǵy jaıylymdar jaǵdaıy tym aýyr. Sondyqtan da, bul salany damytý, ony zańnamalyq turǵydan qamtamasyz etý máselesi óte ózekti. Jaıylym - bul mal baǵýǵa arnalǵan aýyl sharýashylyǵyna paıdalanatyn jer ǵana emes, dál osy salanyń damýymen barlyq mal sharýashylyǵyn órkendetý, halyqtyń ál-aýqatyn jaqsartý máseleleri baılanysty bolyp tabylady. Sonymen qatar, babalardan bizge óte aýqymdy jaıylym resýrstary qalǵany da begili. Osyndaı murany biz saqtap qana qoımaı, keleshek urpaqqa zalalsyz, tozdyrmaı jetkizip otyrýymyz kerek», - dedi jıyndy ashqan depýtat, Agrarlyq máseleler komıtetiniń múshesi Jeksenbaı Dúısebaev.
Toqtala ketetin jaıt, búgingi tańda Májilis qabyrǵasynda «Jaıylymdar týraly» eki zań jobasy qatar talqylanýda. Onyń birin Májilistiń Agrarlyq máseleler komıtetiniń músheleri daıyndaǵan bolsa, ekinshisi Aýyl sharýashylyǵy mınıstrligi tarapynan usynylǵan. Mamandardyń aıtýynsha, bul eki joba bir-birine qaıshy emes, kerisinshe bir-birin tolyqtyratyn tustar jeterlik. Sondyqtan da, depýtattar múddeli mınıstrlikpen birlese otyryp, aldaǵy ýaqytta sapaly zań jobasyn ázirleýge kirispek. Al talqylaýǵa usynylǵan zań jobasy negizinen elimizdegi jaıylymdardy tıimdi, utymdy paıdalanýǵa baılanysty qatynastardy retteıtin bolady. Budan bólek, qujat jaıylymdar ınfraqurylymynyń jaı-kúıin jaqsartýǵa, jaıylym jerleriniń tozýyn boldyrmaýǵa, qorshaǵan ortadaǵy jaıylym ekojúıeleriniń ekologııalyq tutastyǵyn saqtaýǵa baǵyttalǵan.
