Parlament Májilisinde Ulystyń uly kúnine arnalǵan merekelik shara ótti
ANA. 18 naýryz. QazAqparat /Qanat Mámetqazyuly/ - Búgin QR Parlamenti Májilisiniń ǵımaratynda palata depýtattary men Apparat qyzmetkerleri Naýryz meıramyna baılanysty merekelik shara uıymdastyryp, Ulystyń uly kúnin saltanatty túrde atap ótti.
«Minekı, Táýelsiz Qazaqstan óziniń taǵy bir kezekti Naýryz meıramyn toılaýdy bastap jatyr. Osynaý Ulystyń uly kúni sanalatyn meıramnyń maǵynasyn, mánin, dárejesin, tarıhyn endi ǵana bilip kele jatyr. Óıtkeni, kóp jyldar boıy tól mereke elimizde toılanbaı keldi. Naýryz parsydan aýdarǵanda «Jańa kún» degen maǵynany bildiredi. Bul kúni kún men tún teńelip, búkil tabıǵat, tirshilik ataýly jańaryp, túleı bastaıdy. Adamzat ta tabıǵattyń negizgi jáne belsendi bólshegi retinde osy kúni jańaryp, alda turǵan shýaqty kúnderge úlken úmit artyp, tilek tileıdi. Jaqsylyqty yrymdaıdy. Olaı bolatyn bolsa, Áz Naýryz qutty, aldaǵy shýaqty kúnderimiz kóp, aq mol bolsyn!», - dedi óziniń quttyqtaý sózinde Májilis Tóraǵasy Oral Muhamedjanov. Sonymen qatar palata spıkeri byltyrǵy jyldan bergi memleketimizdiń jetistikterine toqtala kele, aldaǵy ýaqyttarda uly murattar mejelengenin, el birliginiń osy maqsatqa jumylǵany mańyzdy bolatynyn atap ótti.
Saltanatty shara merekelik shaǵyn kontserttik baǵdarlamaǵa ulasyp, jıyn sońynan jıylǵan kópshilik Naýryz dastarhanynan dám tatyp, kójesinen aýyz tıip tarqasty.
