Parlament Májilisi sot oryndaýshylaryna qatysty zań jobasyn maquldady
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń atqarýshylyq is júrgizý máseleleri boıynsha keıbir zańnamalyq aktilerine ózgertýler men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zań jobasy atqarýshylyq is júrgizý salasyndaǵy zańnamany jetildirýge jáne atqarýshylyq qujattardy májbúrlep oryndatý salasynda qalyptasyp otyrǵan qoǵamdyq qatynastardy retteýge baǵyttalǵan.
«Zań jobasyn ázirleý kezinde tıisti maqsattardy alǵa qoıdyq. Birinshiden, qujattardyń oryndalý tıimdiligin, sapasy men ýaqytylyǵyn arttyrý. Ekinshiden, kemshilikterdi joıý ári atqarýshylyq is júrgizý taraptarynyń quqyqtaryn buzýǵa jol bermeý. Osyǵan oraı salalyq zań men zańǵa táýeldi aktilerge keshendi taldaý júrgizdik», - dedi depýtat Asylbek Smaǵulov.
Zań jobasyn qabyldaý mynadaı mindetterdi sheshýge múmkindik beredi: jeke sot oryndaýshylarynyń qyzmetin jetildirý jáne atqarýshylyq is júrgizýdiń tıimdiligin, atap aıtqanda, sot oryndaýshysy qabyldaıtyn protsestik qujattardy, áreketterdi ońtaılandyrý jáne osy áreketterdiń rettiligin aıqyndaý arqyly arttyrý; zamanaýı tehnologııalardy engizý, atqarýshylyq is júrgizý taraptary úshin májbúrlep oryndatý júıesiniń ashyqtyǵy men qoljetimdiligin arttyrý; jeke sot oryndaýshylarynyń tártiptik praktıkasyn jetildirý; «Astana» halyqaralyq qarjy ortalyǵy» sot aktilerin atqarýshylyq qujattar tizbesine engizý; memlekettik eńbek ınspektorlary jumys berýshilerdiń jalaqy tólemeý máseleleri boıynsha bergen uıǵarymdardyń tıimdi oryndalýyn qamtamasyz etý.
Joǵaryda kórsetilgen mindetterdi iske asyrý - sot oryndaýshylarynyń, onyń ishinde jeke sot oryndaýshylarynyń qyzmetin serpindi damytýdy qamtamasyz etýge, sondaı-aq atqarýshylyq qujattardy májbúrlep oryndatýdyń tıimdiligin arttyrýǵa yqpal etedi. Bul óz kezeginde azamattardyń buzylǵan quqyqtarynyń tıimdi qorǵalýyn qamtamasyz etýge múmkindik beredi.
Eske sala keteıik, 2019 jyldyń mamyr aıynda ótken Májilistiń jalpy otyrysynda «Qazaqstan Respýblıkasynyń atqarýshylyq is júrgizý máseleleri boıynsha keıbir zańnamalyq aktilerine ózgertýler men tolyqtyrýlar engizý týraly» zań jobasy birinshi oqylymda maquldanǵan edi.
