Parlament Májilisi ózin-ózi taratý týraly Memleket basshysynyń atyna joldanǵan úndeýdi talqylaýǵa kiristi

Eske sala ketsek, buǵan deıin Májilistiń birqatar depýtattary Parlamentti taratyp, saılaýdy merziminen buryn ótkizý týraly bastama kótergen bolatyn. Bul bastamany Májilistegi úsh partııalyq fraktsııa basshylary men músheleri de qoldap otyr. «Búginde jahandyq júıeli daǵdarys álemniń barlyq elderin, tipti damyǵan jetekshi memleketterdi de qamtýda. Álemdegi kúrdeli geoekonomıkalyq jáne geosaıası ahýal halyqaralyq shıelenistiń artýymen, jańa qaqtyǵys oshaqtarynyń paıda bolýymen, lańakestik qaýip-qaterdiń kúsheıýimen qatar órbýde. Qazaqstan egemen el retinde damyp kele jatqan 25 jyldyń ishinde álemdik daǵdarystardyń syn-qaterlerimen san márte betpe-bet keldi jáne biz olardyń barlyǵyna laıyqty toıtarys bere bildik. Tipti, biz ondaı kezeńderdi árdaıym damýdyń jańa sapalyq deńgeıine shyǵýdyń múmkindigi retinde paıdalana bildik. Sol sebepti bizdiń elimiz árqashan, árbir daǵdarystan jańǵyrǵan, qýatty el bolyp shyǵyp keledi», - dedi Májilis depýtaty, «Nur Otan» partııasynyń Májilistegi fraktsııasy múshesi Nurlan Ábdirov.

«Memleket basshysy Nursultan Ábishuly Nazarbaevtyń saıasatynyń arqasynda elimizdiń tek álemdik daǵdarysqa qarsy turýy jóninde ǵana emes jańa jahandyq naqty ahýal jaǵdaıynda damýy týraly strategııasy men naqty Ult jospary bar. Búgin keıinge qaldyrmaıtyn jedel sharalar ýaqyty. Osyǵan baılanysty qazirden bastap jańa reformalardy júzege asyrýǵa jedel kirisý úshin, sonymen birge daǵdarysqa qarsy sharalardy tıimdi júzege asyrý úshin biz, 5-shi shaqyrylymdaǵy Májilistiń ókilettigin merziminen buryn toqtatý jáne Parlamentke jańa taǵaıyndaý saılaý týraly bastama kóteremiz»,- dedi úndeýdi jarııalaǵan N.Ábdirov.