Parlament Májilisi ótkizetin negizgi sharalar naqtylandy
«Altynshy saılanǵan Parlament Májilisiniń aǵymdaǵy sessııasyna arnalǵan is-sharalar josparynyń jobasy Tuńǵysh Prezıdent – Elbasy Nursultan Ábishuly Nazarbaevtyń bes ınstıtýtsıonaldyq reformasyn iske asyrý jónindegi «100 naqty qadam» Ult josparyna sáıkes, sondaı-aq Parlamenttiń osy sessııasynyń ashylýy kezinde Memleket basshysy
Qasym-Jomart Kemeluly Toqaevtyń Qazaqstan halqyna Joldaýynda aıtylǵan tapsyrmalaryna sáıkes ázirlendi. Jospar jobasy Májilistiń turaqty komıtetterinde pysyqtaldy ári ózekti máselelerden týyndaıtyn asa mańyzdy is-sharalardy qamtıdy», - dedi Májilis tóraǵasynyń orynbasary Gúlmıra Isımbaeva.
Onyń sózine qaraǵanda, jospar birneshe bólimnen turady.
Sonyń ishinde 2020 jylǵy qarashada «Qazaqstan Respýblıkasy Prezıdentiniń 2020 jylǵy 1 qyrkúıektegi Joldaýy aıasynda azamattarǵa zań kómegin kórsetý salasyn jetildirý» taqyrybynda parlamenttik tyńdaý ótkizý josparlanyp otyr. Sondaı-aq eldegi sanıtarııalyq-epıdemıologııalyq jaǵdaıdy eskere otyryp, komıtetterdiń kóshpeli otyrystaryn memlekettik organdardyń, úkimettik emes uıymdardyń, bıznes qurylymdardyń qatysýymen beıne-konferents baılanys formatynda keńeıtilgen taqyryptyq otyrystarǵa aýystyrý usynylady.
«Mysaly, Ekologııa komıteti beıindi mınıstrlik pen birneshe oblystardy tarta otyryp, Ekologııalyq kodeksti talqylaý boıynsha otyrys ótkizýdi josparlaýda. Bul otyrys Memleket basshysynyń jyl sońyna deıin Ekologııalyq kodeksti qabyldaýǵa qatysty tapsyrmasy aıasynda ózekti sıpat alyp otyr.Al, Agrarlyq máseleler komıteti mınıstrlikterdiń, Almaty jáne Jambyl oblystary mamandarynyń qatysýymen, áleýmettik máni bar azyq-túlik taýarlarymen halyqtyń ózin-ózi qamtamasyz etýi maqsatynda aýyl sharýashylyǵy kooperatsııasyn damytý máselelerin qaraýdy usyndy.
Osylaısha, oblystardyń problemalary talqylanyp, óńirlermen baılanys saqtalady», - dedi G. Isımbaeva.
Sonymen qatar, aǵymdaǵy sessııanyń birinshi jartysynda arnaıy keste boıynsha jeti Úkimet saǵatyn ótkizý josparǵa alyndy. Sondaı-aq, Májilis qatysatyn, Parlamenttiń parlamentaralyq jáne halyqaralyq qyzmetine baılanysty is-sharalar, halyqaralyq konferentsııalar, dóńgelek ústelder beıne-konferents baılanys formatynda ótkiziletin bolady.
«Qoldaryńyzda Jospardyń jobasy bar. Ol boıynsha osy sessııaǵa 30-ǵa jýyq negizgi is-shara josparlanyp, olar sapaly zań jobalaryn daıyndaýǵa jáne qabyldaýǵa baǵyttalǵan. Altynshy saılanǵan Parlament Májilisiniń altynshy sessııasyna arnalǵan negizgi is-sharalar josparyn bekitýdi suraımyn», - dedi Májilis tóraǵasynyń orynbasary.
Budan buryn habarlanǵandaı, Májilis tóraǵasy Nurlan Nyǵmatýlın aǵymdaǵy sessııa jumysy aýqymdy bolatynyn aıtty.