Parlament Májilisi QR Úkimetine senim bildirdi
ASTANA. QazAqparat - Búgin jalpy otyrysta QR Parlamenti Májilisi QR Úkimetine senim bildirdi. Daýys berý barysynda 96 depýtat qoldady, tórteýi qarsy daýys berdi, al jeteýi qalys qaldy.
«Respýblıkanyń Premer-Mınıstri jańadan saılanǵan Parlament Májilisiniń aldyna Úkimetke senim týraly másele qoıady. Osyǵan baılanysty Premer-Mınıstrdiń haty kelip tústi»,-dedi QR Parlamenti Májilisiniń Tóraǵasy Baqtyqoja Іzmuhambetov.
Jalpy otyrys barysynda depýtattar Úkimetke senim bildirip, tıisti sheshim qabyldandy.
«Qurmetti depýtattar! Keshegi ótken saıası básekede saılaýshylardyń úlken senimine ıe bolǵan shynaıy jeńisterińiz qutty bolsyn! Men jańa ǵana senim mandatyn alǵan Úkimet quramynyń atynan jáne jeke ózimniń atymnan Sizderge jańa qyzmette tabys tileımin. Úkimet sol senimdi barynsha aqtaý jolynda jumysty jalǵastyratyn bolady. Búgin Parlamenttiń birinshi sessııasynyń ashylýynda Memleket basshysy elimizdiń aldynda turǵan mańyzdy mindetterdi jan-jaqty atap kórsetti. Elbasy tapsyrmalaryn iske asyrý jáne halyqtyń ál-aýqatyn jaqsartý jolyndaǵy birlese atqaratyn jumysymyzǵa sáttilik tileımin. Senimderińizge rahmet!»,- dedi Kárim Másimov jalpy otyrysta.
Eske sala ketsek, QR Konstıtýtsııasyna sáıkes "Respýblıkanyń Premer-Mınıstri jańadan saılanǵan Parlament Májilisiniń aldynda Úkimetke senim týraly másele qoıady. Májilis senim bildirgen jaǵdaıda, eger Respýblıka Prezıdenti ózgeshe sheshim qabyldamasa, Úkimet óz mindetterin atqarýdy jalǵastyra beredi".
