Parlament Májilisi qashyqtan jumys rejımine kóshedi
NUR-SULTAN. QazAqparat –Parlament Májilisi 18 naýryzdan 15 sáýirge deıin qashyqtan jumys rejımine kóshedi. Bul týraly QazAqparat Májilistiń baspasóz qyzmetine silteme jasap habarlaıdy.
Mundaı shara koronavırýstyq ınfektsııanyń taralý qaýpine baılanysty elde tótenshe jaǵdaıdyń engizilýine qatysty qabyldandy.
Qaýipsizdikti qamtamasyz etý maqsatynda Parlament Májilisi ǵımaratynda parlamenttik is-sharalarǵa qatysýshylar men kelýshiler, sonymen qatar buqaralyq aqparat quraldarynyń ókilderi úshin shekteý engizildi.
Májilistiń barlyq sharalary (jumys toptary, beıindi komıtetterdiń otyrystary, «úkimet saǵattary», jalpy otyrystar) Palatanyń resmı www.parlam.kz veb-saıtynda onlaın rejıminde kórsetiledi. Sondaı-aq Májilistiń saıtynda ótken sharalar týraly qysqasha málimetter men sýretter jedel túrde jarııalanady.
Sonymen qatar, barlyq qajetti aqparatty baspasóz qyzmetinen: 74-63-04, 74-63-05, 74-68-44 telefondary arqyly alýǵa bolady.
